Yobu 30

Endagaano Enkadde nʼEndagaano Empya

30 ^(A)“Naye kaakano bansekerera;
    abantu abansinga obuto,
bakitaabwe be nnandibadde nteeka
    wamu n’embwa ezikuuma endiga zange.
² Amaanyi g’emikono gyabwe gaali gangasa ki?
    Abantu abaali baweddemu amaanyi ag’obuvubuka bwabwe,
³ abakoozimbye abaali mu bwetaavu era abayala,
    bameketa ettaka ekkalu mu nsi enjereere mu budde obw’ekiro.
⁴ Banoga ebiragala ebiwoomerera ng’omunnyo mu bisaka,
    enkolokolo ez’omwoloola y’emmere yaabwe.
⁵ Baagobebwa bave mu bantu bannaabwe,
    ne babaleekaanira gy’obeera nti, baali babbi.
⁶ Baawalirizibwa okubeera mu migga egyakalira,
    mu njazi ne mu binnya wansi mu ttaka.
⁷ Baakaabira mu bisaka ng’ensolo
    ne beekweka mu bikoola by’emiti.
⁸ Ezzadde ly’abasirusiru abatalina bwe bayitibwa,
    baagobebwa mu nsi.
^9 (B)Naye kaakano abaana baabwe bansekerera nga bannyimba;
    nfuuse ekyenyinyalwa gye bali,
^10 (C)abatanjagala abanneesalako,
    banguwa okunfujjira amalusu mu maaso.
^11 (D)Kaakano Katonda nga bw’atagguludde akasaale kange, ammazeemu amaanyi;
    beeyisizza nga bwe balaba mu maaso gange.
^12 (E)Abantu bano bannumba ku mukono gwange ogwa ddyo;
    bategera ebigere byange emitego,
    ne baziba amakubo banzikirize.
^13 (F)Banzingiza
    ne banzikiriza,
    nga tewali n’omu abayambye.
¹⁴ Banzingiza ng’abayita mu kituli ekigazi,
    bayingira nga bayita mu muwaatwa.
^15 (G)Nnumbiddwa ebitiisa eby’amaanyi;
    ekitiibwa kyange kifuumuuse ng’ekifuuyiddwa empewo,
    era n’obukuumi bwange ne bubulawo ng’ekire.”

^16 (H)“Era kaakano obulamu bwange buseebengerera buggwaawo,
    ennaku ez’okubonaabona zinzijjidde.
¹⁷ Ekiro kifumita amagumba gange
    era obulumi bwe nnina tebukoma.
¹⁸ Mu maanyi ge amangi Katonda abeera ng’olugoye lwe nneebikka,
    n’ensibibwa ng’ekitogi ky’ekyambalo kyange.
^19 (I)Ansuula mu bitosi,
    ne nfuuka ng’enfuufu n’evvu.