Mak 15:21-32

Nouvo Testaman: Vèsyon Kreyòl Fasil

Yo klouwe Jezi sou you kwa

(Mat 27:32-44; Lik 23:26-43; Jan 19:17-19)

²¹ Sou wout la, yo jwenn yon nonm yo rele Simon, moun peyi Sirèn, ki t ap soti nan jaden. Li te papa Aleksann ak Rifis. Sòlda yo fòse Simon pote kwa Jezi a. ²² Yo mennen Jezi yon kote yo rele Gòlgota, ki vle di: “zo tèt.” ²³ Se la yo ba li divin melanje ak lami, men li pa t bwè l. ²⁴ Yo krisifye l epi yo fè tiraj osò pou yo ka separe ata rad ki te sou li, pou wè kisa chak moun ta jwenn.

²⁵ Li te nevè nan maten konsa, lè yo te klouwe Jezi sou kwa a. ²⁶ Sa yo te ekri kòm rezon kondanasyon: nonm sa a, se li menm ki wa Jwif yo. ²⁷ Yo te klouwe de kriminèl sou kwa tou ansanm ak li, youn adwat, youn agoch. ^28 [a]

²⁹ Moun ki t ap fè ale vini nan wout la t ap joure Jezi, epi yo t ap souke tèt yo. Yo t ap di: “Gade misye, se pa ou menm ki t ap di ou ta pral kraze tanp lan epi nan twa jou ou ap rebati l la? ³⁰ Ebyen, kounye a sove tèt ou, desann kwa a!”

³¹ Se te menm jan tou, chèf prèt yo ak direktè Lalwa yo t ap pase li nan betiz, yo t ap di youn lòt: “Li sove lòt moun, epi l pa ka sove pwòp tèt pa l. ³² Si l se Kris la, wa Izrayèl la, se pou l desann kwa a, pou nou wè, epi n ap kwè nan li.” Menm kriminèl ki te klouwe sou lòt kwa yo t ap pase l nan betiz tou.