Namatay si Jesus^(A)

⁴⁵ Mula nang oras na ikaanim^[a] ay nagdilim sa buong lupain hanggang sa oras na ikasiyam.^[b]

⁴⁶ At^(B) nang malapit na ang oras na ikasiyam^[c] ay sumigaw si Jesus ng may malakas na tinig, na sinasabi, “Eli, Eli, lama sabacthani?” na ang kahulugan ay “Diyos ko, Diyos ko, bakit mo ako pinabayaan?”

⁴⁷ At nang marinig ito ng ilan sa mga nakatayo roon ay sinabi nila, “Tinatawag ng taong ito si Elias.”

⁴⁸ Tumakbo^(C) kaagad ang isa sa kanila at kumuha ng isang espongha, pinuno ito ng suka,^[d] inilagay sa isang tambo, at ibinigay sa kanya upang inumin.

⁴⁹ Ngunit sinabi ng iba, “Pabayaan ninyo siya, tingnan natin kung darating si Elias upang iligtas siya.”

⁵⁰ At muling sumigaw si Jesus ng may malakas na tinig at nalagot ang kanyang hininga.

⁵¹ At^(D) nang sandaling iyon, ang tabing ng templo ay napunit sa dalawa, mula sa itaas hanggang sa ibaba; nayanig ang lupa; at nabiyak ang mga bato.

⁵² Nabuksan ang mga libingan at maraming katawan ng mga banal na natulog^[e] ay bumangon,

⁵³ at paglabas nila sa mga libingan pagkatapos ng kanyang muling pagkabuhay ay pumasok sila sa banal na lunsod at nagpakita sa marami.

⁵⁴ Nang makita ng senturion at ng mga kasamahan niyang nagbabantay kay Jesus ang lindol at ang mga bagay na nangyari, sila'y lubhang natakot, at nagsabi, “Tunay na ito ang Anak ng Diyos.”^[f]

⁵⁵ At^(E) marami ding babae roon na nakatanaw mula sa malayo na sumunod kay Jesus buhat sa Galilea, na naglingkod sa kanya.

⁵⁶ Kasama sa mga iyon ay si Maria Magdalena, si Maria na ina nina Santiago at Jose, at ang ina ng mga anak ni Zebedeo.

Ang Pagkamatay ni Jesus^(A)

³³ Nang dumating ang tanghaling tapat, nagdilim sa buong lupain hanggang sa ikatlo ng hapon.

^34 (B) Nang ikatlo ng hapon ay sumigaw si Jesus nang may malakas na tinig, “Eloi, Eloi, lama sabacthani?” na ang kahulugan ay, “Diyos ko, Diyos ko, bakit mo ako pinabayaan?”

³⁵ Nang marinig ito ng ilang nakatayo roon, ay sinabi nila, “Tingnan ninyo, tinatawag niya si Elias.”

³⁶ Tumakbo^(C) ang isa, binasa ng suka ang isang espongha, inilagay sa isang tungkod, at ipinainom sa kanya na sinasabi, “Pabayaan ninyo; tingnan natin kung darating si Elias upang siya'y ibaba.”

³⁷ Si Jesus ay sumigaw nang malakas at nalagutan ng hininga.

³⁸ Ang^(D) tabing ng templo ay nahati sa dalawa, mula sa itaas hanggang sa ibaba.

³⁹ Ang senturion na nakatayong malapit sa harap niya, nang makitang nalagot ang kanyang hininga sa ganitong paraan ay nagsabi, “Tunay na ang taong ito ay Anak ng Diyos.”^[a]

⁴⁰ At^(E) mayroon din namang mga babae na nakatanaw mula sa malayo; kabilang sa kanila ay si Maria Magdalena, si Mariang ina ni Santiago na mas bata at ni Jose, at si Salome;

⁴¹ na nang siya'y nasa Galilea, ay sumunod sa kanya at naglingkod sa kanya; at marami pang ibang mga babae na umahong kasama niya sa Jerusalem.

Ang Kamatayan ni Jesus^(A)

⁴⁴ Nang magtatanghaling-tapat na, nagdilim sa ibabaw ng buong lupain hanggang sa ikatlo ng hapon,

⁴⁵ habang^(B) madilim ang araw; at napunit sa gitna ang tabing ng templo.

⁴⁶ Si^(C) Jesus ay sumigaw ng malakas at nagsabi, “Ama, sa mga kamay mo ay inihahabilin ko ang aking espiritu.” At pagkasabi nito ay nalagot ang kanyang hininga.

⁴⁷ Nang makita ng senturion ang nangyari, pinuri niya ang Diyos at sinabi, “Tunay na ito'y isang taong matuwid.”

⁴⁸ At ang lahat ng mga taong nagkatipon upang makita ang panoorin, nang makita nila ang mga bagay na nangyari ay umuwing dinadagukan ang kanilang mga dibdib.

⁴⁹ At^(D) ang lahat ng mga kakilala niya at ang mga babaing sa kanya'y sumunod buhat sa Galilea ay nakatayo sa malayo at nakita ang mga bagay na ito.