Isinugo ni Jesus ang Labindalawa^(A)

⁵ Ang labindalawang ito ay isinugo ni Jesus, at inutusan na sinasabi, “Huwag kayong pupunta sa pook ng mga Hentil, at huwag kayong papasok sa alinmang bayan ng mga Samaritano;

⁶ kundi puntahan ninyo ang mga nawawalang tupa sa bahay ni Israel.

⁷ At^(B) habang kayo ay humahayo, ipangaral ninyo at sabihing, ‘Malapit na ang kaharian ng langit.’

⁸ Pagalingin ninyo ang mga maysakit, buhayin ninyo ang mga patay, linisin ninyo ang mga ketongin, palayasin ninyo ang mga demonyo. Tinanggap ninyong walang bayad, ibigay ninyong walang bayad.

⁹ Huwag kayong magdala ng ginto, o pilak, o tanso sa inyong mga lalagyan ng pera;

¹⁰ o^(C) supot sa inyong paglalakbay, o dalawang baro o mga sandalyas, o tungkod, sapagkat ang manggagawa ay karapat-dapat sa kanyang pagkain.

¹¹ Sa alinmang bayan o nayon kayo makapasok, hanapin ninyo kung sino roon ang karapat-dapat; at makitira kayo sa kanya hanggang sa inyong pag-alis.

¹² Pagpasok ninyo sa bahay, batiin ninyo ito.

¹³ At kung karapat-dapat ang sambahayan, hayaang mapunta roon ang inyong kapayapaan, ngunit kung hindi karapat-dapat, hayaang mabalik sa inyo ang inyong kapayapaan.

¹⁴ Sinumang^(D) hindi tumanggap sa inyo, o duminig sa inyong mga salita, pag-alis ninyo sa bahay o bayang iyon, ay ipagpag ninyo ang alabok ng inyong mga paa.^[a]

¹⁵ Katotohanang^(E) sinasabi ko sa inyo, higit pang mapapagtiisan sa araw ng paghuhukom ang mga lupain ng Sodoma at Gomorra, kaysa bayang iyon.

Sinugo ni Jesus ang Labindalawa^(A)

⁷ Tinawag niya ang labindalawa, at pinasimulang isugo sila na dala-dalawa. Sila'y binigyan niya ng kapangyarihan laban sa mga masasamang espiritu.

⁸ At ipinagbilin niya sa kanila na huwag silang magdadala ng anuman sa kanilang paglalakbay maliban sa isang tungkod; walang tinapay, walang balutan, walang salapi sa kanilang mga pamigkis,

⁹ kundi magsusuot ng sandalyas at hindi magsusuot ng dalawang tunika.

¹⁰ Sinabi niya sa kanila, “Saanmang bahay kayo pumasok, manatili kayo roon hanggang sa umalis kayo roon.

¹¹ Kung^{(B) (C)} mayroong lugar na hindi kayo tanggapin at ayaw kayong pakinggan, sa pag-alis ninyo ay ipagpag ninyo ang alikabok na nasa inyong mga paa bilang patotoo laban sa kanila.”

¹² Kaya't sila'y humayo at ipinangaral na ang mga tao ay dapat magsisi.

¹³ Nagpalayas^(D) sila ng maraming demonyo, pinahiran ng langis ang maraming maysakit at pinagaling sila.