Isaias 57
Magandang Balita Biblia (with Deuterocanon)
Hinatulan ang Maling Pagsamba
57 Ang taong matuwid kapag namamatay,
walang nakakaunawa at walang nakikialam;
ngunit siya'y kinukuha upang iligtas sa kapahamakan.
2 Mapayapa ang buhay,
ng taong lumalakad sa katuwiran
kahit siya'y mamatay.
3 Halikayo, mga makasalanan upang hatulan.
Wala kayong pagkakaiba sa mga mangkukulam,
nangangalunya at babaing masasama.
4 Sino ba ang inyong pinagtatawanan?
Sino ba ang inyong hinahamak?
Mga anak kayo ng sinungaling.
5 Sinasamba ninyo ang mga diyus-diyosan sa pamamagitan ng pakikipagtalik
habang nasa ilalim ng mga punong ensina na ipinalalagay ninyong sagrado.
Sinusunog ninyo bilang handog ang inyong mga anak,
sa mga altar sa may libis, sa loob ng mga yungib.
6 Makinis na bato'y sinasamba ninyo na tulad ng diyos,
kayo'y kumukuha ng pagkain at alak upang ihandog;
sa gawa bang ito, ako'y malulugod?
7 Sa tuktok ng bundok,
kayo'y umaahon upang maghandog,
at makipagtalik.
8 Pagpasok ng pinto,
nagtayo kayo roon ng diyus-diyosan,
ako'y nilimot ninyo at inyong nilayasan.
Lubos kayong nag-alis ng suot ninyong damit;
sa inyong higaa'y nakipagtalik sa mga lalaking inyong inupahan.
Kayo ay natulog na kasama nila para pagbigyan ang inyong pagnanasa.
9 Kayo ay nagtungo sa hari[a] na may dalang langis ng olibo,
at dinagdagan ninyo ang inyong pabango;
kayo ay nagsugo sa malayong lugar
at kayo mismo ang lumusong sa daigdig ng mga patay.
10 Lubha kayong nagpagod sa maraming lakbayin,
at kailan ma'y hindi sinabi na wala na itong pag-asa.
Kayo ay nagpanibagong-lakas,
at dahil dito ay hindi nanghina.
11 Ang tanong ni Yahweh, “Sino ba ang inyong kinatatakutan
kaya nagsinungaling kayo sa akin
at lubusang tumalikod?
Matagal ba akong nanahimik
kaya kayo tumigil ng pagpaparangal sa akin?
12 Akala ninyo'y tama ang inyong ginagawa.
Ibubunyag ko ang masama ninyong gawa;
at tingnan ko lang kung tutulungan kayo ng mga diyus-diyosang iyan.
13 Ang diyus-diyosang tinatawag ninyo'y hindi makatutulong o makakapagligtas, kahit kayo'y managhoy;
ang mga diyos ninyo'y lilipad kung hangin ay umihip,
kaunting ihip lamang, sila'y itataboy.
Subalit ang taong sa aki'y may tiwala at laging umaasa,
ang banal na bundok at ang lupaing ito'y mamanahin niya.”
Ang Pangakong Tulong at Pagpapagaling ng Diyos
14 Ang sabi ni Yahweh:
“Ang mga hinirang ay inyong bayaang magbalik sa akin,
ang bawat hadlang sa daan ay inyong alisin; ang landas ay gawin at inyong ayusin.”
15 “Ako ang Kataas-taasan at Banal na Diyos,
ang Diyos na walang hanggan.
Matataas at banal na lugar ang aking tahanan,
sa mababang-loob at nagsisisi, ako ay sasama,
aking ibabalik ang pagtitiwala nila at pag-asa.
16 Ako ang nagbigay ng buhay sa aking bayan,
sila'y hindi ko patuloy na uusigin;
at ang galit ko sa kanila'y
hindi mananatili sa habang panahon.
17 Nagalit ako sa kanila dahil sa kanilang kasalana't kasakiman,
kaya sila'y aking itinakwil.
Ngunit matigas ang kanilang ulo at patuloy na sumuway sa akin.
18 Sa kabila ng ginawa nila, sila'y aking pagagalingin at tutulungan,
at ang nagluluksa'y aking aaliwin.
19 Bibigyan(A) ko ng kapayapaan ang lahat, maging nasa malayo o nasa malapit man.
Aking pagagalingin ang aking bayan.
20 Ngunit ang masasama ay tulad ng dagat na laging maalon,
walang pahinga sa buong panahon;
mga burak at putik buhat sa ilalim ang iniaahon.
21 Walang(B) kapayapaan ang mga makasalanan.” Sabi ng aking Diyos.
Footnotes
- 9 sa hari: o kaya'y kay Molec .
Isaias 57
Ang Biblia (1978)
Makaidolatria na ugali ng Israel.
57 Ang matuwid na namamatay, at walang taong nagdadamdam; at mga taong mahabagin ay pumapanaw, walang gumugunita na ang matuwid ay naalis sa kasamaan na darating.
2 Siya'y nanasok sa kapayapaan; sila'y nagpapahinga sa (A)kanilang mga higaan bawa't lumalakad sa kaniyang katuwiran.
3 Nguni't magsilapit kayo rito, kayong mga anak ng babaing manghuhula, na lahi ng mangangalunya at ng patutot.
4 Laban kanino nakipagaglahian kayo? laban kanino nagluluwang kayo ng bibig, at naglalawit ng dila? hindi baga kayo mga anak ng pagsalangsang, (B)lahing sinungaling,
5 Kayong mga nangagaalab (C)sa inyong sarili sa gitna ng mga encina, (D)sa ilalim ng bawa't sariwang punong kahoy; na (E)pumapatay ng mga anak sa mga libis, sa mga bitak ng mga bato sa mga bangin?
6 Nasa gitna ng mga makinis na bato sa libis ang iyong bahagi; sila, sila ang iyong bahagi; sa kanila ka nga nagbuhos ng inuming handog, ikaw ay naghandog ng alay. Matatahimik baga ako sa mga bagay na ito?
7 Sa isang mataas (F)at matayog na bundok ay inilagay mo ang (G)iyong higaan; doon ka naman sumampa upang maghandog ng hain.
8 At sa likod ng mga pintuan at ng mga tukod ay itinaas mo ang iyong alaala: sapagka't ikaw ay nagpakahubad (H)sa iba kay sa akin, at ikaw ay sumampa; iyong pinalaki ang iyong higaan, at nakipagtipan ka sa kanila: (I)iyong inibig ang kanilang higaan saan mo man makita.
9 At ikaw ay naparoon sa hari na may pahid na langis, at iyong pinarami ang iyong mga pabango, at iyong sinugo ang iyong mga sugo sa malayo, at ikaw ay nagpakababa hanggang sa Sheol.
10 Ikaw ay napagod sa kahabaan ng iyong lakad; gayon ma'y hindi mo sinabi, (J)Walang kabuluhan: ikaw ay nakasumpong ng kabuhayan ng iyong lakas; kaya't hindi ka nanglupaypay.
Ang pagpapakababa at pagtitiis ng Panginoon.
11 At (K)kanino ka nangilabot at natakot, (L)na ikaw ay nagsisinungaling, at hindi mo ako inalaala, o dinamdam mo man? (M)hindi baga ako tumahimik na malaong panahon, at hindi mo ako kinatatakutan.
12 Aking ipahahayag ang iyong katuwiran; at tungkol sa iyong mga gawa, ang mga yaong hindi makikinabang sa iyo.
13 Pagka ikaw ay humihiyaw, iligtas ka nila na iyong pinisan; nguni't tatangayin sila ng hangin, isang hinga ay tatangay sa kanila: (N)nguni't siyang naglalagak ng kaniyang tiwala sa akin ay (O)magaari ng lupain, at magmamana ng aking banal na (P)bundok.
14 At kaniyang sasabihin, (Q)Inyong patagin, inyong patagin, inyong ihanda ang lansangan, inyong alisin ang katitisuran sa lansangan ng aking bayan.
15 Sapagka't ganito ang sabi ng Mataas at Matayog na tumatahan sa walang hanggan, (R)na ang pangalan ay (S)Banal; Ako'y tumatahan sa mataas at banal na dako na (T)kasama rin niya na may pagsisisi at pagpapakumbabang-loob, upang bumuhay ng loob (U)ng nagpapakumbaba, at upang bumuhay ng puso ng nagsisisi.
16 Sapagka't hindi ako (V)makikipagtalo magpakailan man, o mapopoot man akong lagi; sapagka't ang diwa ay manglulupaypay sa harap ko, at ang mga kaluluwa na aking ginawa.
17 (W)Dahil sa kasamaan ng kaniyang kasakiman ay napoot ako, at sinaktan ko siya; aking ikinubli ang aking mukha at ako'y napoot; at siya'y yumaong nanghimagsik ng lakad ng kaniyang puso.
18 Aking nakita ang kaniyang mga lakad, at pagagalingin ko (X)siya; akin ding papatnubayan siya, at bibigyan ko ng mga kaaliwan siya, at ang (Y)kaniyang nangananangis.
19 Aking nililikha ang (Z)bunga ng mga labi: (AA)Kapayapaan, kapayapaan, sa kaniya (AB)na malayo at sa kaniya na malapit, sabi ng Panginoon; at aking pagagalingin siya.
20 Nguni't ang masama (AC)ay parang maunos na dagat; sapagka't hindi maaring humusay, at ang kaniyang tubig ay umaalimbukay ng burak at dumi.
21 Walang kapayapaan, (AD)sabi ng aking Dios, sa mga masama.
Ang Bagong Tipan: Filipino Standard Version, Copyright © Philippine Bible Society 2009.
Ang Biblia Copyright © Philippine Bible Society 1905, 1915, 1933, 1978