2 Kaya nga nalalaman ninyo rin, ^(A)mga kapatid, na ang aming pagkapasok sa inyo, ay hindi nawalan ng kabuluhan:

² Kundi palibhasa'y nagsipagbata kami nang una at inalipusta, gaya ng inyong nalalaman, ^(B)sa Filipos, ay nangagkaroon kami ng kalakasan ng loob dahil sa ating Dios ^(C)upang salitain sa inyo ang evangelio ng Dios sa gitna ng maraming kaligaligan.

³ Sapagka't ang aming iniaaral ay hindi sa kamalian, ni sa ^(D)karumihan, ni sa pagdaraya.

⁴ Kundi kung paanong kami'y minarapat ng Dios upang pagkatiwalaan kami ng evangelio, ay gayon namin sinasalita; ^(E)hindi gaya ng nangagbibigay lugod sa mga tao, kundi sa Dios na sumusubok ng aming mga puso.

⁵ Sapagka't hindi kami nasusumpungang nagsisigamit kailan man ng mga salitang paimbabaw, gaya ng nalalaman ninyo, ni ng balabal man ng ^(F)kasakiman, saksi ang Dios;

⁶ Ni nagsihanap man sa mga tao ng kapurihan, ni sa inyo man, ni sa mga iba man, nang maaaring magsigamit ^(G)kami ng kapamahalaan ^(H)gaya ng mga apostol ni Cristo.

⁷ Kundi kami ay nangagpapakalumanay sa gitna ninyo, na gaya ng isang sisiwa pagka inaamoamo ang kaniyang sariling mga anak:

⁸ Gayon din kami, palibhasa'y may magiliw na pagibig sa inyo, ay kinalugdan naming kayo'y bahaginan, hindi lamang ng evangelio ng Dios, kundi naman ng ^(I)aming sariling mga kaluluwa, sapagka't kayo'y naging lalong mahal sa amin.

⁹ Sapagka't inaalaala ninyo, mga kapatid, ang aming ^(J)pagpapagal at pagdaramdam: amin ngang ipinangaral ang evangelio ng Dios na kami ay gumagawa gabi't araw, upang huwag kaming maging isang pasanin sa kanino man sa inyo.

¹⁰ Kayo'y mga saksi, at ang Dios man, kung gaanong pagkabanal at pagkamatuwid at pagkawalang kapintasan ang inugali namin sa inyong nagsisisampalataya:

¹¹ Gaya ng inyong nalalaman kung ano ang inugali namin sa bawa't isa sa inyo, na ^(K)gaya ng isang ama sa kaniyang sariling mga anak, na kayo'y inaaralan, at pinalalakas ang loob ninyo, at nagpapatotoo,

¹² Upang kayo'y ^(L)magsilakad ng nararapat sa Dios, ^(M)na siyang tumawag sa inyo sa kaniyang sariling kaharian at kaluwalhatian.

¹³ At dahil naman dito kami ay nangagpapasalamat na walang patid sa Dios, na nang ^(N)inyong tanggapin sa amin ang salita na ipinangaral, sa makatuwid baga'y ang salita ng Dios, ay inyong tinanggap na ^(O)hindi gaya ng salita ng mga tao, kundi, ayon sa katotohanan, na salita ng Dios, na gumagawa naman sa inyo na nagsisisampalataya.

¹⁴ Sapagka't kayo, mga kapatid, ay nagsitulad ^(P)sa mga iglesia ng Dios na nasa Judea kay Cristo Jesus: ^(Q)sapagka't nagsipagbata naman kayo sa inyong sariling mga kababayan, ^(R)gaya naman nila sa mga Judio;

¹⁵ Na nagsipatay sa Panginoong Jesus, at gayon din ^(S)sa mga propeta, at kami ay kanilang pinalayas, at di nangagbibigay lugod sa Dios, at laban sa lahat ng mga tao;

¹⁶ Na pinagbabawalan kaming makipagusap ^(T)sa mga Gentil upang mangaligtas ang mga ito; upang ^(U)kanilang paramihing lagi ang kanilang mga kasalanan: nguni't dumating sa kanila ang kagalitan, hanggang sa katapusan.

¹⁷ Nguni't kami, mga kapatid, na nangahiwalay sa inyong sangdaling panahon, ^(V)sa katawan hindi sa puso, ay ^(W)nangagsisikap na lubha, upang makita ang inyong mukha na may dakilang pagnanais:

¹⁸ Sapagka't nangagnasa kaming pumariyan sa inyo, akong si Pablo, na minsan at muli; at hinadlangan kami ni Satanas.

¹⁹ Sapagka't ^(X)ano ang aming pagasa, o katuwaan, o putong, ^(Y)na ipinagmamapuri? Hindi baga kayo rin sa harapan ng ating Panginoong Jesucristo ^(Z)sa kaniyang pagparito?

²⁰ Sapagka't kayo ang aming kaluwalhatian at aming katuwaan.

Ang Pangangaral ni Pablo sa Tesalonica

2 Kayo mismo ang nakakaalam, mga kapatid, na ang aming pagdating sa inyo ay hindi nawalan ng kabuluhan.

² Bagaman^(A) nagdusa na kami at inalipusta sa Filipos, tulad ng inyong nalalaman, ay naglakas loob kami sa ating Diyos upang ipahayag sa inyo ang ebanghelyo ng Diyos sa gitna ng napakalaking pagsalungat.

³ Sapagkat ang aming pangaral ay hindi mula sa pandaraya, ni sa karumihan, ni sa panlilinlang,

⁴ kundi kung paanong kami'y minarapat ng Diyos na pagkatiwalaan ng ebanghelyo ay gayon kami nagsasalita, hindi upang bigyang-lugod ang mga tao, kundi ang Diyos na sumusuri sa aming mga puso.

⁵ Sapagkat hindi kami natagpuang gumamit kailanman ng mga salitang paimbabaw, gaya ng nalalaman ninyo, ni ng balabal ng kasakiman, saksi namin ang Diyos;

⁶ ni nagsihanap man sa mga tao ng kapurihan, ni sa inyo o sa iba man, bagaman may karapatan kaming humingi bilang mga apostol ni Cristo.

⁷ Kundi kami ay naging malumanay sa gitna ninyo, gaya ng isang ina na nag-aaruga sa kanyang mga anak.

⁸ Palibhasa'y nagmamalasakit kami sa inyo, ipinasiya naming kayo'y bahaginan, hindi lamang ng ebanghelyo ng Diyos, kundi pati ng aming mga sariling kaluluwa, sapagkat kayo'y napamahal na sa amin.

⁹ Natatandaan ninyo, mga kapatid, ang aming pagpapagal at paghihirap. Gumagawa kami araw at gabi upang huwag kaming maging pasanin sa kaninuman sa inyo. Ipinahayag namin sa inyo ang ebanghelyo ng Diyos.

¹⁰ Kayo'y mga saksi, at pati ang Diyos, kung gaano kadalisay, matuwid at walang kapintasan ang inasal namin sa inyo na mga mananampalataya.

¹¹ Gaya ng inyong nalalaman, pinakitunguhan namin kayong tulad ng isang ama sa kanyang mga anak,

¹² na kayo'y pinangaralan at pinalakas ang loob ninyo, at nagpatotoo, upang kayo'y lumakad nang nararapat sa Diyos, na siyang tumawag sa inyo sa kanyang sariling kaharian at kaluwalhatian.

¹³ At kami ay patuloy na nagpapasalamat sa Diyos, na nang inyong tanggapin ang salita ng Diyos na inyong narinig sa amin ay inyong tinanggap iyon hindi bilang salita ng mga tao, kundi, ayon sa katotohanan, ay bilang salita ng Diyos, na gumagawa naman sa inyo na sumasampalataya.

¹⁴ Sapagkat^(B) kayo, mga kapatid, ay naging taga-tulad sa mga iglesya ng Diyos kay Cristo Jesus na nasa Judea, sapagkat nagdusa din naman kayo ng mga gayong bagay mula sa inyong sariling mga kababayan, gaya naman nila sa mga Judio.

¹⁵ Sila^(C) ang pumatay sa Panginoong Jesus at sa mga propeta, at kami ay kanilang pinalayas. Sila'y hindi nagbigay-lugod sa Diyos at sinalungat ang lahat ng mga tao,

¹⁶ at pinagbawalan kaming magsalita sa mga Hentil upang maligtas ang mga ito. Kaya't kanilang pinupunong lagi ang kanilang mga kasalanan; ngunit dumating sa kanila ang poot ng Diyos hanggang sa katapusan.

Nais ni Pablo na Muli Silang Dalawin

¹⁷ Ngunit kami, mga kapatid, na nahiwalay sa inyo ng maikling panahon, sa katawan hindi sa puso, ay lalong higit na nananabik na makita kayo nang mukhaan.

¹⁸ Sapagkat nais naming pumunta sa inyo—lalo na akong si Pablo na paulit-ulit na nais makabalik—ngunit hinadlangan kami ni Satanas.

¹⁹ Sapagkat ano ang aming pag-asa, o kagalakan, o putong ng kapurihan sa harapan ng ating Panginoong Jesus sa kanyang pagdating? Hindi ba kayo?

²⁰ Sapagkat kayo ang aming kaluwalhatian at kagalakan.