⁴ “Kodi nʼchifukwa choti umamuopa, kuti azikudzudzula,
    kuti azifuna kukukokera ku mlandu?
⁵ Kodi osati nʼchifukwa chakuti kuyipa kwako nʼkwakukulu?
    Kodi machimo ako si opanda malire?
⁶ Iwe unkawumiriza abale ako kuti akupatse chikole popanda chifukwa;
    umalanda anthu zovala zawo ndi kuwasiya amaliseche.
⁷ Sunawapatse madzi anthu otopa,
    ndipo unawamana chakudya anthu anjala,
⁸ ngakhale unali munthu wamphamvu, wokhala ndi malo akeake,
    munthu waulemu wake, wokhala mʼdzikomo.
⁹ Ndipo akazi amasiye unawachotsa wopanda kanthu,
    ndipo unapondereza ana amasiye.
¹⁰ Nʼchifukwa chake misampha yakuzungulira,
    nʼchifukwa chake tsoka ladzidzidzi lakuchititsa mantha,
¹¹ nʼchifukwa chake kuli mdima kuti sungathe kuona kanthu,
    nʼchifukwa chakenso madzi achigumula akumiza.

¹² “Kodi Mulungu sali kutalitali kumwamba?
    Ndipo ona nyenyezi zili mmwamba kwambirizo, ona kutalika kwake pamene zililipo!
¹³ Komabe iweyo ukunena kuti, ‘Kodi Mulungu amadziwa chiyani?
    Kodi Iye amaweruza mu mdima woterewu?
¹⁴ Mitambo yakuda yamuphimba, kotero kuti Iye sakutiona
    pamene akuyendayenda pamwamba pa thambopo.’
¹⁵ Kodi iwe udzayendabe mʼnjira yakale
    imene anthu oyipa ankayendamo?
¹⁶ Iwo anachotsedwa nthawi yawo isanakwane,
    maziko awo anakokoloka ndi madzi achigumula.
¹⁷ Anthuwo anati kwa Mulungu, ‘Tichokereni!
    Kodi Wamphamvuzonse angatichitire chiyani?’
¹⁸ Chonsecho ndi Iye amene anadzaza nyumba zawo ndi zinthu zabwino,
    choncho ine sindigwirizana ndi uphungu wa anthu oyipa.

¹⁹ “Anthu olungama amaona kuwonongeka kwawo ndipo amakondwera;
    anthu osalakwa amangoseka, akamuona woyipa akulangidwa.
²⁰ Amanena kuti, ‘Ndithudi adani athu awonongeka
    ndipo moto wawononga chuma chawo!’

²¹ “Gonjera Mulungu kuti ukhale naye pamtendere;
    ukatero udzaona zabwino.
²² Landira malangizo a pakamwa pake
    ndipo usunge mawu ake mu mtima mwako.
²³ Ukabwerera kwa Wamphamvuzonse udzabwezeretsedwa;
    ukachotsa zoyipa zonse zimene zimachitika mʼnyumba mwako,
²⁴ ndipo chuma chamtengowapatali nuchiona ngati fumbi,
    golide wa ku Ofiri numutaya ku miyala ya ku zigwa.
²⁵ Pamenepo Wamphamvuzonseyo adzakhala golide wako,
    siliva wako wamtengowapatali.
²⁶ Pamenepo udzakondwera naye Wamphamvuzonse
    ndipo udzakweza nkhope yako kwa Mulungu.
²⁷ Udzamupempha ndipo adzakumvera,
    ndipo udzapereka zimene unalonjeza.
²⁸ Chimene watsimikiza kuti uchite, chidzachitikadi,
    kuwala kudzakuwunikira pa njira yako.
²⁹ Pamene anthu agwetsedwa pansi, iwe nʼkunena kuti, ‘Akwezeni!’
    Pamenepo Iye adzapulumutsa anthu oponderezedwa.
³⁰ Iye adzapulumutsa ngakhale munthu amene ndi wolakwa,
    ameneyo adzapulumutsidwa kudzera mʼkulungama kwako.”