Yobu 14

Mawu a Mulungu mu Chichewa Chalero

14 “Munthu wobadwa mwa amayi
    amakhala masiku owerengeka ndipo ndi odzaza ndi mavuto okhaokha.
² Amaphuka ngati duwa ndipo kenaka amafota;
    amathawa ngati mthunzi ndipo sakhalitsa.
³ Kodi munthu wotereyo nʼkumuyangʼanitsitsa?
    Kodi mungamubweretse pamaso panu kuti mumuzenge mlandu?
⁴ Ndani angatulutse chabwino mʼchoyipa?
    Palibe ndi mmodzi yemwe!
⁵ Masiku a munthu ndi odziwikiratu;
    munakhazikitsa chiwerengero cha miyezi yake
    ndipo munamulembera malire amene sangathe kuwalumpha.
⁶ Choncho Inu mumufulatire ndipo mumuleke apumule
    kufikira atakondwera nawo moyo ngati munthu waganyu.

⁷ “Mtengo uli nacho chiyembekezo:
    ngati wadulidwa, udzaphukiranso
    ndipo nthambi zake sizidzaleka kuphukira.
⁸ Mizu yake ingathe kukalamba mʼnthaka
    ndipo chitsa chake nʼkuwola pa dothi,
⁹ koma pamene chinyontho chafika udzaphukira
    ndipo udzaphuka nthambi ngati mtengo wanthete.
¹⁰ Koma munthu amafa nayikidwa mʼmanda,
    amapuma mpweya wotsiriza ndipo kutha kwake nʼkomweko.
¹¹ Monga madzi amaphwera mʼnyanja
    kapena monga mtsinje umaphwera nuwuma,
¹² momwemonso munthu amagona ndipo sadzukanso;
    mpaka zamlengalenga zidzathe, anthu sadzauka
    kapena kudzutsidwa ku tulo tawo.

¹³ “Aa, Inu mukanangondibisa mʼmanda
    ndi kundiphimba kuti ndisaoneke mpaka mkwiyo wanu utapita!
Achikhala munandiyikira nthawi,
    kuti pambuyo pake mundikumbukirenso.
¹⁴ Munthu akafa, kodi adzakhalanso ndi moyo?
    Masiku anga onse a moyo wovutikawu
    ndidzadikira mpaka itafika nthawi yomasulidwa.
¹⁵ Inu mudzandiyitane ndipo ndidzakuyankhani;
    inu mudzafunitsitsa kuona cholengedwa chimene munachipanga ndi manja anu.
¹⁶ Ndithudi pamenepo mudzayangʼana mayendedwe anga
    koma simudzalondola tchimo langa.
¹⁷ Zolakwa zanga zidzakulungidwa mʼthumba;
    inu mudzaphimba tchimo langa.

¹⁸ “Koma monga phiri limakokolokera ndi kuswekasweka
    ndipo monga thanthwe limasunthira kuchoka pa malo ake,
¹⁹ monganso madzi oyenda amaperesera miyala
    ndipo madzi othamanga amakokololera nthaka,
    momwemonso Inu mumawononga chiyembekezo cha munthu.
²⁰ Inu mumamugonjetsa kamodzinʼkamodzi ndipo munthuyo nʼkutheratu;
    Inu mumasintha maonekedwe a nkhope yake ndipo mumamutaya kutali.
²¹ Ana ake akamalemekezedwa, iyeyo sazidziwa zimenezo;
    akamachititsidwa manyazi iye saziona zimenezo.
²² Iye amangomva zowawa za mʼthupi lake
    ndipo amangodzilirira yekha mwini wakeyo.”