43 Koma tsopano, Yehova
    amene anakulenga, iwe Yakobo,
    amene anakuwumba, iwe Israeli akuti,
“Usaope, pakuti ndakuwombola;
    Ndinakuyitanitsa mokutchula dzina lako, ndiwe wanga.
² Pamene ukuwoloka nyanja,
    ndidzakhala nawe;
ndipo pamene ukuwoloka mitsinje,
    sidzakukokolola.
Pamene ukudutsa pa moto,
    sudzapsa;
    lawi la moto silidzakutentha.
³ Chifukwa Ine Yehova, Mulungu wako,
    Woyera wa Israeli, ndine Mpulumutsi wako.
Ndinapereka Igupto pofuna kuti ndiwombole iwe,
    ndinapereka Kusi ndi Seba mʼmalo mwa iwe.
⁴ Popeza kuti ndiwe wamtengowapatali wolemekezeka ndi wapamtima panga,
    ndipo chifukwa ndimakukonda,
ndidzapereka anthu mʼmalo mwa iwe,
    ndidzapereka mitundu ya anthu pofuna kuwombola moyo wako.
⁵ Usachite mantha, pakuti Ine ndili nawe;
    ndidzabweretsa ana ako kuchokera kummawa,
    ndipo ndidzakusonkhanitsani kuchokera kumadzulo.
⁶ Ndidzawuza a kumpoto kuti, ‘Amasuleni,’
    ndidzawuza akummwera kuti, ‘Musawagwire.’
Bweretsani ana anga aamuna kuchokera ku mayiko akutali,
    ana anga a akazi kuchokera kumalekezero a dziko lapansi;
⁷ onsewo amadziwika ndi dzina langa;
    ndinawalenga chifukwa cha ulemerero wanga,
    ndinawawumba, inde ndinawapanga.”
⁸ Tulutsa anthu amene ali nawo maso koma sakupenya,
    anthu amene ali nawo makutu koma sakumva.
⁹ Mitundu yonse ya anthu isonkhane pamodzi,
    anthu a mitundu ina akhale pamodzi pabwalo la milandu.
Ndani wa iwo amene ananeneratu zimenezi?
    Ndani wa iwo anatifotokozerapo zinthu zakalekale?
Abweretu ndi mboni zawo kuti adzatsimikizire kuti ananena zoona,
    kuti anthu ena amve ndi kunena kuti, “Ndi zoona.”
¹⁰ Yehova akunena kuti, “Inu Aisraeli ndinu mboni zanga,
    ndi mtumiki wanga amene ndinakusankha,
kuti mundidziwe ndi kundikhulupirira, ndipo mudzamvetsa kuti Mulungu ndine ndekha.
    Patsogolo panga sipanapangidwepo mulungu wina,
ngakhale pambuyo panga
    sipadzakhalaponso wina.”
¹¹ Akutero Yehova, “Ine, Inetu ndine Yehova,
    ndipo palibe Mpulumutsi wina koma Ine ndekha.
¹² Ndine amene ndinaneneratu, amene ndinakupulumutsa;
    ndine, osati mulungu wina wachilendo pakati panu amene ndinalengezeratu.
Inu ndinu mboni zanga, kuti Ine ndine Mulungu,” akutero Yehova.
¹³     “Ine ndine Mulungu kuyambira nthawi yamakedzana, ndipo ndidzakhalabe Mulungu ku nthawi zonse.
Palibe amene angathe kuthawa mʼmanja mwanga,
    ndipo chimene ndachita palibe angathe kuchisintha.”

¹⁴ Yehova akuti,
    Mpulumutsi wanu, Woyerayo wa Israeli akuti,
“Chifukwa cha inu ndidzatuma gulu lankhondo kukalimbana ndi Babuloni
    ndi kukupulumutsani.
    Ndidzagwetsa zitseko zonse za mzindawo, ndipo kukondwa kwa anthu ake kudzasanduka kulira.
¹⁵ Ine ndine Yehova, Woyera wanu uja,
    Mlengi wa Israeli. Ine ndine Mfumu yanu.”