Salmo 59

Ang Salita ng Dios (Tagalog Contemporary Bible)

59 O Dios, iligtas nʼyo ako sa aking mga kaaway.
    At sa mga kumakalaban sa akin, ako ay inyong ingatan.
² Iligtas nʼyo ako sa masasama at sa mga mamamatay-tao.
³ Panginoon, tingnan nʼyo!
    Inaabangan nila ako para patayin,
    kahit na wala akong nagawang kasalanan sa kanila.
^4-5 Wala akong nagawang kasalanan,
    ngunit handa silang salakayin ako.
    Sige na po, Panginoong Dios na Makapangyarihan, Dios ng Israel.
    Tingnan nʼyo na ang nangyayari; tulungan nʼyo ako!
    Kumilos na kayo, at parusahan nʼyo ang mga bansang hindi sumasampalataya sa inyo.
    Huwag nʼyong kahabagan ang mga taksil na iyon.
⁶ Bumabalik sila kapag gabi at tumatahol
    gaya ng aso habang naglilibot sila sa bayan.
⁷ Pakinggan nʼyo ang kanilang pananalita; kasing sakit ng tusok ng espada.
    At sinasabi pa nila, “Wala namang nakakarinig sa atin.”
⁸ Ngunit, pinagtatawanan nʼyo lang sila Panginoon.
    Kinukutya nʼyo ang mga taong hindi sumasampalataya sa inyo.
⁹ O Dios ikaw ang aking kalakasan.
    Maghihintay ako sa inyo dahil ikaw ang aking tagapagtanggol,
¹⁰ at ikaw ang Dios na nagmamahal sa akin.
    Manguna ka sa akin at ipakita mo sa akin ang pagbagsak ng aking mga kaaway.
¹¹ Pero huwag nʼyo silang patayin agad
    para hindi makalimutan ng aking mga kababayan
    kung paano nʼyo pinarurusahan ang inyong mga kaaway.
    O Panginoon na aming pananggalang,
    iligaw nʼyo at ibagsak ang aking mga kaaway sa pamamagitan ng inyong kapangyarihan.
¹² Nagkakasala sila dahil sa kasamaan ng kanilang sinasabi.
Mahuli sana sila sa kanilang kayabangan.
Nagmumura sila at nagsisinungaling,
¹³ kaya sa inyong galit, lipulin nʼyo sila hanggang sa silaʼy maglaho.
    Sa gayon ay malalaman ng buong mundo na kayo, O Dios, ang naghahari sa Israel.
¹⁴ Bumabalik ang mga kaaway ko kapag gabi at tumatahol
    gaya ng aso habang naglilibot sila sa bayan.
¹⁵ Naglilibot sila para humanap ng pagkain at umaalulong kapag hindi nabusog.
¹⁶ Ngunit ako ay aawit tungkol sa inyong kapangyarihan.
    Tuwing umaga aawit ako nang may kagalakan tungkol sa inyong pag-ibig.
    Sapagkat kayo ang aking kanlungan sa oras ng kagipitan.
¹⁷ O Dios, kayo ang aking kalakasan.
    Aawit ako ng mga papuri sa inyo,
    dahil kayo ang aking kanlungan at Dios na sa akin ay nagmamahal.