Roma 10
Ne Bibliaj Tik Nawat
Muchi ne tayulmatit welit mumelakchiwat
10 Nukniwan, nuyulu kielewia wan niktajtani ne Teut ma mumakishtikan yejemet, 2 ika nikmati ka kipiat devocion ipal Teut, melka te ika kishmatit. 3 Te kishmatit ne itamelakchiwalis ne Teut, wan melka kitemuat isel ne tamelakchiwalis te kitakamatit ne itamelakchiwalis ne Teut. 4 Ika ne Mawaltijtuk ne itamilis ne tajtuli; kimelakchiwa muchi ká tayulmatit.
5 Ika Moshe tajkwilua ka ne ká tamelakchiwa ijtik ne tajtuli, yawi yultuk ijkiuni. 6 Ne tamelakchiwalis ipal ne tayulmatilis ina kiane: Maka shina tik muyulu, "Ká yawi tejku ka ilwikak?" Kineki ina: pal kalwika ne Mawaltijtuk katani. 7 Nian, "Ká yawi temu ka miktan?" Kineki ina: pal kishtia ne Mawaltijtuk ijtik ne miktiwit wan kalwika. 8 Tay ina tel? Munawak nemi, tik ne muten wan tik ne muyulu. Né nemi ne tay ipal ne tayulmatilis ne titanajnawatiat. 9 Ika su tina iwan ne muten ka ijkia ne tajtzin Yeshu wan tikmati iwan ne muyulu ka ne Teut kiyulkwepki kwak mikik, tiaw timumakishtia. 10 Ika iwan ne tuyulu tikmatit ne tamelakchiwalis, wan iwan ne tuten tinat ka ijkia wan timumakishtiat.
11 Ne ijkwilujtuk ina:
"Muchi ká kiyulmatit inte mushijshikusket."
12 Ika Yudayujmet wan Greciajtakamet muchi kenhat, ika muchi kipiat sanse tajtzin wan yaja kimaka muchi ká kinutzat, 13 wan muchi ká kinutzat ne itukay ne Tajtzin yawit mupalewiat.
14 Kwakuni, ken kinutzasket ne Tajtzin su te kiyulmatit? Wan ken kiyulmatisket su te kikaktiwit? Wan ken takakisket su te aka tanajnawatia? 15 Wan ken tanajnawatisket su te mutitaniat?
Ken muijkwilujtuk:
"Yek ajsitiwit ne ijikshi ne kinawatiat tay yek."
16 Te muchi kitakamattiwit ne yeknawatilis. Ishaya ina:
"Tajtzin, ká kiyulmattuk tay mukaki tupanpa?"
17 Muyulmati, tel, ipanpa tay mukaki, wan mukaki itech ne ipalabraj ne Mawaltijtuk. 18 Wan nina: anka te takaktiwit? Tejkia ka:
"Nujme taketzat ipanpa,
hasta kan tami ne taltikpak mukakit inpajpalabraj."
19 Wan nina: anka te kimati katka Israel? Achtu Moshe inak:
"Naja nimetzinkwalantis iwan se inte-techan,
iwan se techan ne inte kimati tatka nikchiwas ma shikwalanikan."
20 Ishaya te majmawi wan ina:
"Ne ká inte nechtemuat nechajsiket,
nalmuneshtij ipal ne ká inte tajtanket nupanpa."
21 Kilwia Israel:
"Tik muchi ne tunal nikweyakilij nujnumey
wan niknutzki tukniwan ká inte tayulmatit wan najnankiliat."
Ne Bibliaj Tik Nawat · © 2008, 2012 Jan Morrow