7 Iwe namwali waufumu, mapazi ako ngokongola
    mu nsapato wavalazo!
Ntchafu zako nʼzowumbika bwino ngati miyala yamtengowapatali,
    ntchito ya manja ya mmisiri waluso.
² Mchombo wako uli ngati chikho chowumbika bwino
    chimene nthawi zonse ndi chodzaza ndi vinyo.
Chiwuno chako ndi choningʼa ngati mtolo wa tirigu
    utazunguliridwa ndi maluwa okongola.
³ Mawere ako akuoneka ngati ana awiri a mbawala,
    ngati mphoyo zamapasa.
⁴ Khosi lako lili see! ngati nsanja ya mnyanga wa njovu.
Maso ako ali ngati mayiwe a ku Hesiboni,
    amene ali pafupi ndi chipata cha Bati Rabimu.
Mphuno yako ili ngati nsanja ya ku Lebanoni,
    yoyangʼana ku Damasiko.
⁵ Mutu wako uli bwinobwino nengʼaa ngati phiri la Karimeli.
    Tsitsi lako lili ngati nsalu yakuda yaufumu;
    mfumu yakopeka ndi maonekedwe ake okongola.
⁶ Ndiwe wokongola kwambiri ndiponso wosangalatsa,
    iwe wokondedwa, namwali wokondweretsawe!
⁷ Msinkhu wako uli ngati mtengo wa mgwalangwa,
    ndipo mawere ako ali ngati phava la zipatso.
⁸ Ndinati, “Ndikwera mtengo wa mgwalangwa;
    ndidzathyola zipatso zake.”
Mawere ako ali ngati maphava a mphesa,
    fungo la mpweya wako lili ngati ma apulosi,
⁹     ndipo pakamwa pako pali ngati vinyo wokoma kwambiri.

Tsono vinyo ameneyu amuthirire wachikondi wanga,
    ayenderere bwino pa milomo yake ndi mano ake.
¹⁰ Wokondedwayo ine ndine wake,
    ndipo chilakolako chake chili pa ine.
¹¹ Bwera wachikondi wanga, tiye tipite ku madera a ku midzi,
    tikagone ku midzi.
¹² Tiye tilawirire mmamawa kupita ku minda ya mpesa,
    tikaone ngati mitengo ya mpesa yayamba kuphukira,
ngati maluwa ake ayamba kuoneka,
    komanso ngati makangadza ayamba kuonetsa maluwa.
    Kumeneko ndidzakuonetsa chikondi changa.
¹³ Mitengo ya mankhwala a chisulo ikupereka fungo lake labwino,
    ndipo pa khomo pathu pali zipatso zonse zokoma,
zatsopano ndi zakale zomwe,
    zimene ndakusungira wokondedwa wanga.