We Can Stand Up Agains Da Bad Kine Stuff An Win

5 Whoeva stay shua dat Jesus da Spesho Guy God Wen Send, dey Godʼs kids. Everybody dat get love an aloha fo one fadda get love an aloha fo his kids too. ² Dis how we know dat we get love an aloha fo Godʼs kids, cuz we get love an aloha fo God an do wat he tell us fo do. ³ If we get love an aloha fo God, dat mean we do wat he tell us fo do. An da stuff he tell us fo do, not too hard. ⁴ Cuz all Godʼs kids can stand up agains da bad kine stuff inside da world, an win. Dis how we can do dat: we trus God. ⁵ Da guy dat stay shua dat Jesus Godʼs Boy, az da ony guy dat can stand up agains da bad kine stuff inside da world, an win.

Three Tings Dat Tell Bout Jesus

⁶ Jesus, he da Guy dat wen come wit water, dat time John wen baptize him. He come wit blood, dat time dey wen kill him. He come, not wit water ony, but wit water an blood. Godʼs Spirit tell us dat dis stay true, cuz his Spirit tell da trut. ⁷ So, get three tings dat tell da trut bout Jesus, ⁸ da Spirit, da water, an da blood. An dey all say da same ting. ⁹ We listen wat da peopo tell us. But wat God say get mo power still yet, cuz come from God. An dass wat God awready tell bout his Boy. ¹⁰ Whoeva trus Godʼs Boy get wat God say bout him inside his heart. But whoeva no trus God, jalike dey stay say, “God, he one bulaia!” cuz dey no trus wat God wen say bout his Boy. ¹¹ Dis wat God say: he wen give us da real kine life dat goin stay to da max foeva, an dat kine life come from his Boy. ¹² Whoeva stick wit Godʼs Boy get dat kine life inside him. Whoeva no stick wit Godʼs Boy no mo dat kine life inside him.

Da Kine Life Dat Goin Stay To Da Max Foeva

¹³ I write dis to you guys dat stay trus Godʼs Boy so you guys can know dat you guys get da real kine life dat stay to da max foeva. ¹⁴ Everytime we aks God fo do da tings he like make happen, we know fo shua dat he hear us. ¹⁵ An if we know dat he stay listen fo wateva we aks him, den we know dat we goin get da tings we wen aks him fo do.

¹⁶ If you see yoa brudda doing bad kine stuff dat no make da brudda mahke, you gotta aks God fo help um, an God goin give da brudda life. I talking bout da bad kine tings dat peopo do, but dat no make um mahke. Get bad stuff dat make um mahke -- I no say dat you gotta pray bout dat kine. ¹⁷ Everyting dat stay wrong, dass bad kine stuff. An get bad kine stuff dat no make da guy mahke dat do um.

¹⁸ We know dat everybody dat stay Godʼs kid no stay doing bad kine stuff, cuz Godʼs Boy take care him, an da Bad Guy, da Devil, no can hurt him.

¹⁹ Us guys know dat we come from God, but da Bad Guy stay in charge a all da odda peopo inside da whole world.

²⁰ We know dat Godʼs Boy wen come an help us fo undastan, so dat we can know da One dass God fo real kine. Us guys stay tight wit da One dass God fo real kine -- wit Godʼs Boy Jesus, da Spesho Guy God Wen Send. Dass da real God, an dass da real kine life dat stay to da max foeva.

²¹ Eh you guys! You jalike my own kids! So, stay away from da idol kine gods.