³ Makhalidwe ochitira ena chifundo ndi owonetsa kukhulupirika asakuchokere.
    Uwamangirire mʼkhosi mwako ngati mkanda
    ndi kuwalemba pa mtima pako.
⁴ Ukatero udzapeza kuyanja ndi mbiri yabwino
    pamaso pa Mulungu ndi anthu.

⁵ Uzikhulupirira Yehova ndi mtima wako wonse
    ndipo usadalire nzeru zako za kumvetsa zinthu.
⁶ Pa zochita zako zonse uvomereze kuti Mulungu alipo,
    ndipo Iye adzawongola njira zako.

⁷ Usamadzione ngati wa nzeru.
    Uziopa Yehova ndi kupewa zoyipa.
⁸ Ukatero thupi lako lidzakhala la moyo wabwino
    ndi mafupa ako adzakhala olimba.

⁹ Uzilemekeza Yehova ndi chuma chako chonse;
    zokolola zonse zoyamba kucha uzilemekeza nazonso Yehova.
¹⁰ Ukatero nkhokwe zako zidzadzaza ndi zinthu zambiri,
    ndiponso mitsuko yako idzadzaza ndi vinyo.

¹¹ Mwana wanga usanyoze malangizo a Yehova,
    ndipo usayipidwe ndi chidzudzulo chake.
¹² Paja Yehova amadzudzula amene amamukonda,
    monga abambo achitira mwana amene amakondwera naye.

¹³ Wodala munthu amene wapeza nzeru,
    munthu amene walandira nzeru zomvetsa zinthu,
¹⁴ pakuti phindu la nzeru ndi labwino kuposa la siliva,
    phindu lakelo ndi labwino kuposanso golide.
¹⁵ Nzeru ndi yoposa miyala yamtengowapatali;
    ndipo zonse zimene umazikhumba sizingafanane ndi nzeru.
¹⁶ Mʼdzanja lake lamanja muli moyo wautali;
    mʼdzanja lake lamanzere muli chuma ndi ulemu.
¹⁷ Njira zake ndi njira zosangalatsa,
    ndipo mu njira zake zonse muli mtendere.
¹⁸ Nzeru ili ngati mtengo wopatsa moyo kwa oyigwiritsitsa;
    wodala munthu amene amayigwiritsa kwambiri.

¹⁹ Yehova anakhazikitsa dziko lapansi pogwiritsa ntchito nzeru.
    Anagwiritsanso ntchito nzeru zakudziwa bwino zinthu pamene ankakhazikitsa zakumwamba.
²⁰ Mwa nzeru zake Yehova anatumphutsa madzi kuchokera mʼnthaka
    ndiponso mitambo inagwetsa mvula.

²¹ Mwana wanga usunge nzeru yeniyeni ndi khalidwe lomalingarira zinthu bwino.
    Zimenezi zisakuchokere.
²² Zimenezi zidzakupatsa moyo,
    moyo wake wosangalatsa ndi wabwino ngati mkanda wa mʼkhosi.
²³ Choncho udzayenda pa njira yako mosaopa kanthu,
    ndipo phazi lako silidzapunthwa;
²⁴ pamene ugona pansi, sudzachita mantha;
    ukadzagona pansi tulo tako tidzakhala tokoma.
²⁵ Usaope tsoka lobwera mwadzidzidzi
    kapena chiwonongeko chimene chidzagwera anthu oyipa,
²⁶ pakuti Yehova adzakulimbitsa mtima
    ndipo adzasunga phazi lako kuti lisakodwe mu msampha.

²⁷ Usaleke kuchitira zabwino amene ayenera kulandira zabwino,
    pamene uli nazo mphamvu zochitira zimenezi.
²⁸ Usanene kwa mnansi wako kuti,
    “Pita, uchite kubweranso. Ndidzakupatsa mawa”
    pamene uli nazo tsopano.

²⁹ Usamukonzere chiwembu mnansi wako,
    amene anakhala nawe pafupi mokudalira.
³⁰ Usakangane ndi munthu wopanda chifukwa
    pamene iye sanakuchitire zoyipa.

³¹ Usachite naye nsanje munthu wachiwawa
    kapena kutsanzira khalidwe lake lililonse.
³² Pakuti Yehova amanyansidwa ndi munthu woyipa
    koma amayanjana nawo anthu olungama.

³³ Yehova amatemberera nyumba ya munthu woyipa,
    koma amadalitsa nyumba ya anthu olungama.
³⁴ Anthu onyoza, Iye amawanyoza,
    koma amakomera mtima anthu odzichepetsa.
³⁵ Anthu anzeru adzalandira ulemu,
    koma zitsiru adzazichititsa manyazi.