यहूदी नेतन क ईसू क कतल करइ क चाल

(मरकुस 14:1-2; लूका 22:1-2; यूहन्ना 11:45-53)

26 इ सब बातन क कहि चुकइ क पाछे ईसू आपन चेलन स बोला, ² “तू पचे जानत ह कि दुइ दिना पाछे पसह क त्यौहार बाटइ। अउर मनई क पूत दुस्मनन क हाथन स क्रूसे प चढ़ाइ जाइ बरे पकड़वाइ जाइवाला अहइ।”

³ तब मुख्ययाजकन अउर बुजुर्ग यहूदी नेतन कैफ़ा नाउँ क महायाजक क घरे क आँगन मँ ऍकट्ठा भएन। ⁴ अउर उ पचे कउनो चाल स ईसू क धरइ अउर मार डावइ क छल करेन। ⁵ फिन भी उ सबइ कहत रहेन, “हमका इ फसह क त्यौहार क दिनन मँ नाहीं करइ चाही। नाहीं तउ होइ सकत ह मनई दंगा फसाद कइ बइठइँ।”