Mateo 5:1-12

Ang Biblia, 2001

Ang Sermon sa Bundok

5 Nang makita ni Jesus ang napakaraming tao, umakyat siya sa bundok, at pagkaupo niya ay lumapit sa kanya ang mga alagad niya.

² At binuka niya ang kanyang bibig at tinuruan sila, na sinasabi:

Ang Mapapalad^(A)

³ “Mapapalad ang mga dukha sa espiritu, sapagkat kanila ang kaharian ng langit.

⁴ “Mapapalad^(B) ang mga nahahapis, sapagkat sila ay aaliwin.

⁵ “Mapapalad^(C) ang mga mapagpakumbaba, sapagkat mamanahin nila ang lupa.

⁶ “Mapapalad^(D) ang mga nagugutom at nauuhaw sa katuwiran, sapagkat sila ay bubusugin.

⁷ “Mapapalad ang mga mahabagin, sapagkat sila'y kahahabagan.

⁸ “Mapapalad^(E) ang mga may malinis na puso, sapagkat makikita nila ang Diyos.

⁹ “Mapapalad ang mga mapagpayapa, sapagkat sila ay tatawaging mga anak ng Diyos.

¹⁰ “Mapapalad^(F) ang mga inuusig dahil sa katuwiran, sapagkat kanila ang kaharian ng langit.

¹¹ “Mapapalad^(G) kayo kapag kayo ay nilalait, inuusig, at pinagsasabihan ng sari-saring kasamaan na pawang kasinungalingan dahil sa akin.

¹² “Magalak^(H) kayo at magsaya, sapagkat malaki ang gantimpala ninyo sa langit, sapagkat gayundin nila inusig ang mga propeta na nauna sa inyo.