Ang Banal na Hapunan^(A)

²⁶ Habang sila'y kumakain ay dumampot si Jesus ng tinapay, binasbasan niya ito at pinagputul-putol, at ibinigay sa mga alagad, at sinabi, “Kumuha kayo, kainin ninyo; ito ang aking katawan.”

²⁷ At kumuha siya ng isang saro^[a] at nang makapagpasalamat ay ibinigay sa kanila, na nagsasabi, “Uminom kayong lahat nito,

²⁸ sapagkat^(B) ito ang aking dugo ng tipan,^[b] na nabubuhos dahil sa marami, sa ikapagpapatawad ng mga kasalanan.

²⁹ At sinasabi ko sa inyo, mula ngayon ay hindi na ako iinom ng katas ng ubas na ito hanggang sa araw na iyon na iinumin kong panibago na kasalo kayo sa kaharian ng aking Ama.”

³⁰ At pagkaawit nila ng isang himno ay nagtungo sila sa Bundok ng mga Olibo.

Ang Banal na Hapunan^(A)

²² Samantalang sila'y kumakain, dumampot siya ng tinapay, at nang kanyang mabasbasan ay kanyang pinagputul-putol, ibinigay sa kanila at sinabi, “Kunin ninyo; ito ang aking katawan.”

²³ Siya'y dumampot ng isang kopa at nang siya'y makapagpasalamat ay ibinigay niya sa kanila, at mula roo'y uminom silang lahat.

²⁴ At^(B) sinabi niya sa kanila, “Ito ang aking dugo ng tipan,^[a] na nabubuhos para sa marami.

²⁵ Katotohanang sinasabi ko sa inyo, hindi na ako iinom mula sa bunga ng ubas, hanggang sa araw na iyon na inumin kong panibago sa kaharian ng Diyos.

²⁶ At pagkaawit ng isang himno, lumabas sila patungo sa bundok ng mga Olibo.

Pagganap ng Hapunan ng Panginoon^(A)

²³ Sapagkat tinanggap ko sa Panginoon ang ibinigay ko naman sa inyo, na ang Panginoong Jesus nang gabing siya'y ipagkanulo ay dumampot ng tinapay;

²⁴ at nang siya'y makapagpasalamat, ito ay kanyang pinagputul-putol, at sinabi, “Ito'y aking katawan na pinagputul-putol para sa inyo. Gawin ninyo ito sa pag-aalaala sa akin.”

²⁵ Sa^(B) gayunding paraan ay kinuha niya ang kopa, pagkatapos maghapunan, na sinasabi, “Ang kopang ito'y siyang bagong tipan sa aking dugo. Gawin ninyo ito tuwing kayo'y iinom nito, sa pag-aalaala sa akin.”