Mateo 16:5-12

Magandang Balita Biblia (with Deuterocanon)

Ang Pampaalsang Ginagamit ng mga Pariseo at mga Saduseo^(A)

⁵ Nang tumawid sa ibayo ang mga alagad, nakalimutan nilang magdala ng tinapay. ⁶ Sinabi^(B) ni Jesus sa kanila, “Mag-ingat kayo sa pampaalsang kinakalat ng mga Pariseo at mga Saduseo.”

⁷ Nag-usap-usap ang mga alagad, “Wala kasi tayong dalang tinapay, kaya sinabi niya iyon.”

⁸ Alam ni Jesus ang pinag-uusapan nila kaya't sila'y tinanong, “Bakit ninyo pinag-uusapang wala kayong dalang tinapay? Napakaliit ng inyong pananampalataya! ⁹ Hindi^(C) pa ba ninyo nauunawaan hanggang ngayon? Nakalimutan na ba ninyo ang limang tinapay na pinaghati-hati para sa limanlibong tao? Ilang kaing na tinapay ang lumabis? ¹⁰ Gayundin^(D) ang pitong tinapay para sa apat na libo. Ilang kaing na tinapay ang lumabis? ¹¹ Hindi tungkol sa tinapay ang sinasabi ko nang sabihin ko sa inyong mag-ingat kayo sa pampaalsang kinakalat ng mga Pariseo at mga Saduseo! Hindi ba ninyo maunawaan ito?” ¹² At naunawaan nila na sila'y pinag-iingat niya sa mga katuruan ng mga Pariseo at mga Saduseo, at hindi sa pampaalsang ginagamit sa tinapay.