Mateo 16:5-12

Ang Bagong Tipan: Filipino Standard Version

Ang Pampaalsang Gamit ng mga Fariseo at ng mga Saduceo^(A)

⁵ Nang tumawid sa kabilang pampang ang mga alagad ay nakalimutan nilang magdala ng tinapay. ⁶ Sinabi ^(B) ni Jesus sa kanila, “Mag-ingat kayo at iwasan ninyo ang pampaalsang ginagamit ng mga Fariseo at ng mga Saduceo.” ⁷ Pinag-usapan nila iyon at sinabi nila, “Dahil hindi tayo nagdala ng tinapay.” ⁸ Ngunit batid ito ni Jesus kaya't sinabi niya, “Kayong mahina ang pananampalataya! Bakit pinagtatalunan ninyo na kayo'y walang tinapay? ⁹ Hindi ^(C) pa ba kayo nakauunawa? Hindi ba ninyo naaalala ang limang tinapay na ipinakain sa limang libo at kung ilang kaing ang inyong natipon; ¹⁰ o ^(D) iyong pitong tinapay na ipinakain sa apat na libo at kung ilang kaing ang inyong natipon? ¹¹ Paanong hindi ninyo nauunawaan na hindi tinapay ang tinutukoy ko nang sabihin kong ‘Mag-ingat kayo sa pampaalsang ginagamit ng mga Fariseo at mga Saduceo!’ ” ¹² Noon ay naunawaan nila na hindi niya sinabing mag-ingat sila sa pampaalsa ng tinapay, kundi sa itinuturo ng mga Fariseo at mga Saduceo.