³ —Suertej kipiat ne munekit tik inyulu, ika inpal ne tatekimakalis ipal ne ilwikak.

⁴ Suertej ne mutechtiat, ika yejemet walmunutzasket.

⁵ Suertej ne yujyulyamanik, ika ne tal yawi inpal.

⁶ Suertej ne mayanat wan amikit ma muchiwa ne tay yek, ika yejemet yawit ishwit.

⁷ Suertej ne kinpalewiat sejseuk, ika yejemet mupalewisket.

⁸ Suertej ne kipiat inyulu yek, ika yejemet yawit kitat ne Teut.

⁹ Suertej ne nejmachchiwanimet, ika yejemet yawit munutzat ikukunew ne Teut.

¹⁰ Suertej ne ká kintalultiat ipanpa ne tay yek, ika inpal ne tatekimakalis ipal ne ilwikak.

¹¹ Suertej ankipiat kwak metzinhijilwisket wan metzintalultiat wan inasket sanka ka numaku: ¹² shipajpakikan ika anmupatiw wey tik ne ilwikak, ika kenhaya kintalultijket ne taketzanimet pal ikman.

¹³ Anmejemet ne iistayu ne tal. Su ne istat intea ajwiak, ken tikistawisket? Intea yek pal tatka, semaya pal tiktamutat ma taksakan ijpak.

¹⁴ Anmejemet ne itawilyu ne taltikpak. Inte welit tikinayat se techan ijpak se tepet, ¹⁵ nian kitatiat tawil wan kitaliat itan se wajkal asunte ijpak ne tawilkal pal kintajtawilua muchi tik ne kal. ¹⁶ Ijkiuni ma tatawi ne anmutawil ishpan muchi pal kitat tay ankichiwat yek wan pal inat ka wey ne Anmuteku ka ikajku.

¹⁷ Maka shikejketzakan ka niwalaj pal niktajkali ne tajtuli nian ne taketzanimet; niwalaj pal ma yekawi: ¹⁸ ika naja kia nimetzinhilwia ka hasta tamit ne ilwikak wan ne tal, nian se I nian se U ipal ne tajtuli yawi panu hasta muchiwa muchi. ¹⁹ Yajika, ká inte kitajpia se chiupichin pal muchi tay nemi tuktijtuk wan ijkiuni kinmachtia sejseuk, yaja munutzas te-tatka tik ne tatekimakalis ipal ne ilwikak. Wan ká kichiwa wan tamachtia, yajaya munutzas wey tik ne tatekimakalis ipal ne ilwikak. ²⁰ Ika nimetzinhilwia ka su inte ankichiwat mas yek que ne tajkwiluanimet wan ne Parishayujmet, inte ankalakisket ijtik ne tatekimakalis ipal ne ilwikak!

²¹ Antakaktiwita ka ikman inatiwit "Maka shitamikti"; ká ne tamiktia welit kichiwat juzgar. ²² Yek, naja nimetzinhilwia ka muchi ká kwalani iwan ne iiknew welit kichiwat juzgar. Ká ne kilwia ne iiknew: "Tzuntet!", welit kiwikat ishpan kalpuli; ká ne kilwia: "Mele!", welit kitamutat tik ne tit pal ne miktanshaput. ²³ Yajika, asu talwika se pal tiktakulia pak ne tikashit, wan ikuni tikelnamiki ka kwalantuk ne muiknew mupanpa, ²⁴ shikajkawa ishpan ne tikashit ne mutetakulis wan shu achtu shimukawa yek iwan ne muiknew, wan kwakuni shalmukwepa wan shalwika tay tiaw tiktakulia. ²⁵ Shimunelwi timutalia yek iwan ká metztenewa kwak tinejnemiuk iwan ijtik ne ujti; shiktali cuidadoj ma yaja inte yawi metztemaka iwan ne juez, wan ne juez iwan ne tatuktiani wan yawi metzilpia tzaktuk. ²⁶ Naja nimetzilwia: inte tiaw tikisa hasta ma shiktashtawa ne tipan centavoj!

²⁷ Antakaktiwita ka inatiwit "Maka shimawilti." ²⁸ Yek, naja nimetzinhilwia ka muchi ká kita se siwat munamiktijtuk wan kielewia, yaja kiawiltija tik iyulu. ²⁹ Asu ne se muish metztekukujmati, shikwiwita wan shiktamima wejka, ika mas yek ma shikpulu se mutakutun wan tesu ma kitamutakan muchi muweyka ka miktanshaput. ³⁰ Wan asu ne se mumey metztekukujmati, shikutuna wan shiktamuta wejka, ika mas yek ma shikpulu se mutakutun wan tesu ma puliwi tik miktanshaput muchi muweyka.

³¹ Nusan inatiwit, ká kiajkawa ne isiwaw, ma kimaka se amat kan ina ka muajkawtiwit. ³² Naja nimetzinhilwia ka su aka kiajkawa ne isiwaw, kwak te ika yaja mawiltia, kichiwa ka yaja mawiltia, wan ká munamiktia iwan ne muajkawtuk nusan mawiltia.

³³ Senpa antakaktiwit ka ikman inatiwit: Maka shina tay inte yawi muchiwa, asunte shiktashtawi ne Muteku muchi tay tikchiwtuk jurar. ³⁴ Yek, naja nimetzinhilwia semaya ini: maka shikchiwakan jurar tatka; inte ipanpa ne ilwikak, ika ne imutalijka ne Teut; ³⁵ nian ipanpa ne tal, ika ne petat itan ijikshi ne Teut; nian ipanpa Yerushalem, ika ne itechan ne wey tatuktiani; ³⁶ wan ipanpa ne mutzuntekun nusan maka shikchiwa jurar ika te tiweli tikchiwa ma istak o ma tiltik nian sechin pal mutzujtzunkaltzitzin. ³⁷ Shina sema "yek, yek; te, te", ika muchi ukseuk tay tina yawi ipal ne inteyek.

³⁸ Antakaktiwit ka inatiwit ma mutashtawa ipanpa se tuish iwan se iish ne seuk wan ipanpa se tutan iwan se itan. ³⁹ Yek, naja nimetzinhilwia: maka shiksuma ne inteyek, asunte asu metzmaka tik se mukamak, shikishkwepili ne seuk nusan, ⁴⁰ wan ne kineki metztenewa ipanpa tay tikchijtuk wan metzishtiliskia ne muwipil, shikajkawili nusan ne mutaken, ⁴¹ wan asu aka metzilwia ka nemi pal tinejnemi se kilometroj iwan, shinejnemi ume. ⁴² Shikmaka ká ne metztajtani, wan ne kineki ma shikajkawili maka shikilwi inte.

⁴³ Antakaktiwit ka inatiwit: shiktasujta ne muiknew wan shikishijia ne metzishijia. ⁴⁴ Yek, naja nimetzinhilwia: shiktasujtakan ne kinekit metzinhijtakuat, wan shiktajtanikan ne Teut ma kinpalewi ne metzintalultiat, ⁴⁵ pal kiane anmuchiwat ipilawan Anmuteku ka ikajku, ika yaja kichiwa ka kisa ne tunal inhijpak ne inte yejyek wan ne yejyek, wan kichiwa ka wetzi ne at ijpak ne kichiwat tay yek wan ijpak ne inte kichiwat tay yek. ⁴⁶ Ika su ankintasujtat ne metzintasujtat, tay ipatiw uni tay ankichijtiwit? Anka ne tumintepewanimet inte kichiwat kenha? ⁴⁷ Wan asu semaya ankintajpaluat ne anmukniwan, tay uni? Anka muchi ne tejtechan inte kichiwat ijkiuni? ⁴⁸ Anmejemet tel shimuchiwakan yejyek ken Anmuteku ka ikajku ká semaya yek.