Mga Batong-Katitisuran^(A)

⁴² “At kung ang sinuman ay magbigay ng katitisuran sa isa sa maliliit na ito na sumasampalataya sa akin, mabuti pang bitinan ang kanyang leeg ng isang malaking gilingang bato at itapon sa dagat.

⁴³ Kung^(B) ang kamay mo ay nakapagpapatisod sa iyo, putulin mo ito. Mas mabuti pa sa iyo ang pumasok sa buhay na baldado, kaysa may dalawang kamay at mapunta sa impiyerno, sa apoy na hindi mapapatay,

[⁴⁴ na kung saan ang kanilang mga uod ay hindi namamatay, at ang apoy ay hindi napapatay.]

⁴⁵ Kung ang paa mo'y nakapagpapatisod sa iyo, putulin mo ito. Mas mabuti pa sa iyo ang pumasok sa buhay na pilay kaysa may dalawang paa ka at maitapon sa impiyerno,

[⁴⁶ na kung saan ang kanilang mga uod ay hindi namamatay, at ang apoy ay hindi napapatay.]

⁴⁷ Kung^(C) ang mata mo'y nakapagpapatisod sa iyo, dukitin mo ito. Mas mabuti pa sa iyo ang pumasok sa kaharian ng Diyos na may isang mata, kaysa may dalawang mata at mabulid sa impiyerno,

⁴⁸ na^(D) kung saan ang kanilang mga uod ay hindi namamatay, at ang apoy ay hindi napapatay.

Pagpapatawad sa Kapatid^(A)

17 Sinabi ni Jesus^[a] sa kanyang mga alagad, “Hindi maaaring di dumating ang mga kadahilanan ng pagkatisod, subalit kahabag-habag ang sinuman na pinanggagalingan niyon.

² Mabuti pa sa kanya na bitinan ang kanyang leeg ng isang batong panggiling, at ihagis siya sa dagat, kaysa siya ang maging sanhi ng pagkatisod ng isa sa maliliit na ito.