5 Inu Yehova, kumbukirani zimene zinatichitikira;
    yangʼanani ndipo muone kunyozeka kwathu.
² Apereka cholowa chathu kwa obwera,
    nyumba zathu kwa alendo.
³ Takhala amasiye ndi wopanda abambo,
    amayi athu ali ngati akazi amasiye.
⁴ Tiyenera kugula madzi amene timamwa,
    nkhuni zathunso nʼzogula.
⁵ Otilondola atigwira pakhosi;
    tafowoka ndipo sakutilola kupumula.
⁶ Tinadzipereka kwa Aigupto ndi kwa Asiriya
    kuti tipeze chakudya.
⁷ Makolo athu anachimwa ndipo anafa kale,
    koma chilango chawo chili pa ife.
⁸ Akapolo akutilamulira,
    ndipo palibe ndi mmodzi yemwe angatimasule mʼdzanja lawo.
⁹ Timapeza chakudya chathu poyika miyoyo yathu pa chiswe
    chifukwa cha lupanga mʼchipululu.
¹⁰ Khungu lathu latentha ngati uvuni mʼngʼanjo,
    chifukwa cha kuwawa kwa njala.
¹¹ Amayi agwiriridwa mu Ziyoni,
    ndi anamwali mʼmizinda ya Yuda.
¹² Akalonga athu akuwapachika pomangirira manja awo,
    akuluakulu sakuwalemekeza.
¹³ Achinyamata akukakamizidwa kupera tirigu;
    anyamata akudzandira ndi mitolo ya nkhuni.
¹⁴ Akuluakulu anachokapo pa chipata cha mzinda;
    achinyamata aleka nyimbo zawo.
¹⁵ Chimwemwe chachoka mʼmitima yathu;
    kuvina kwathu kwasanduka maliro.
¹⁶ Chipewa chathu chaufumu chagwa pamutu pathu.
    Tsoka kwa ife, chifukwa tachimwa!
¹⁷ Mitima yathu yakomoka chifukwa cha zimenezi,
    chifukwa cha zinthu zimenezi maso athu sakuona bwino,
¹⁸ pakuti phiri la Ziyoni, limene lasanduka bwinja,
    nkhandwe zikungoyendayendapo.

¹⁹ Inu Yehova, lamulirani kwamuyaya;
    mpando wanu waufumu udzakhalabe ku mibadomibado.
²⁰ Chifukwa chiyani mumatiyiwala nthawi zonse?
    Chifukwa chiyani mwatitaya nthawi yayitali chotere?
²¹ Yehova mutitembenuzire kwa Inu, kuti tibwerere;
    mukonzenso masiku athu akhale monga akale,
²² pokhapokha ngati mwatitaya kotheratu,
    ndi kuti mwatikwiyira kobzola muyeso.