Lucas 2:1-7

Ang Biblia, 2001

Ang Kapanganakan ni Jesus^(A)

2 Nang mga araw na iyon ay lumabas ang isang utos mula kay Augusto Cesar upang magpatala ang buong daigdig.

² Ito ang unang pagtatala na ginawa nang si Quirinio ay gobernador sa Siria.

³ Pumunta ang lahat upang magpatala, bawat isa sa kanyang sariling bayan.

⁴ Umahon din si Jose mula sa Galilea mula sa bayan ng Nazaret, patungo sa Judea, sa lunsod ni David, na tinatawag na Bethlehem, sapagkat siya'y mula sa sambahayan at lipi ni David,

⁵ upang magpatalang kasama ni Maria na kanyang magiging asawa, na noon ay malapit nang manganak.

⁶ Samantalang sila'y naroroon, dumating ang panahon ng kanyang panganganak.

⁷ At kanyang isinilang ang kanyang panganay na anak na lalaki, binalot niya ito ng mga lampin,^[a] at inihiga sa isang sabsaban sapagkat walang lugar para sa kanila sa bahay-panuluyan.