Kolosay 3

Ne Bibliaj Tik Nawat

3 Yajika, su anmusenyulkwiltijtiwit iwan ne Mawaltijtuk, shiktemukan ne tay ipal ne ajku kan ne Mawaltijtuk nemi muetztuk ka imayekkan ne Teut. ² Shikishkejketzakan tay ipal ne ajku, tesu tay ipal ne taltikpak, ³ ika anmiktiwit wan ne anmunemilis minashtuk inawak ne Mawaltijtuk itech ne Teut. ⁴ Kwak ne Mawaltijtuk yawi muneshtia, yaja kwak anyawit yujyultuk; kwakuni anmejemet nusan yawit muneshtiat tzitzinakat.

⁵ Yajika, shikpulukan ne tajtakutun ipal ne taltikpak: tatzinhejenchiwalis, susulkayu, tanekilis, taelewilis teyek, wan taelewilis ipal tay tepal, yaja teutzintankwaketzalis. ⁶ Ipanpa muchi ini witz ne ikwalan ne Teut. ⁷ Nusan anmejemet niakeman annejnentiwit kwak anyujyultuk katka ijkiuni. ⁸ Ashan shiktamimakanha muchi, anmejemet nusan: kwalan, inteyek, kukujtaketzalis, muchi pal tishpinawat tay kisa itech anmuten. ⁹ Maka shimuilwikan sajsanka, ika ankishtijtiwita ne takat ne achtu nemituya iwan muchi tay yaja kichiwa katka ¹⁰ wan ankitalijtiwit ne yankwik, ká yankwikisa tik taishmatilis ken itachialis ne ká kichijki, ¹¹ kan ne tesu kanaj Greciajtakat wan Yudayuj, yawaltektuk wan tzuntepul, Indioj, ejkuni, tepaltekitini, isel itekuyu, sute muchi ne Mawaltijtuk wan tik muchi.

¹² Shimutakentikan tel, ken tayulmatinit ijishpejpentuk ipal ne Teut wan tajtasujtatuk, iwan yulkukulis ipal taeknelilis, yek, kanawakmatilis, yulyamanikayu, weytejchialis, ¹³ wan shimuselikan ne se iwan ne seuk, wan shimutapupulwikan su aka kipia se taika kiajwaskia se, ijkiunisan ken nusan ne Tajtzin metzintapupulwijtuk, anmejemet kenha. ¹⁴ Wan ijpak muchi ini, ne tetasujtalis: yaja iilpika ne yekawilis. ¹⁵ Wan ne inejmachnemilis ne Mawaltijtuk ma tatukti ijtik anmuyujyulu. Yajika nusan anmunutztiwit pal anmuchiwat ken sanse anmuweyka, wan shipajpakikan.

¹⁶ Ma nemi ijtik anmejemet ne ipalabraj ne Mawaltijtuk iwan muchi ne tamatilis; shitamachtikan wan shimunawatikan ne se iwan ne seuk iwan sajsalmoj wan tajtakwikalis ipal ne Teut; shitakwikakan iwan tetasujtalis ijtik anmuyujyulu ipal ne Teut. ¹⁷ Wan muchi tay anhinat wan ankichiwat, shinakan wan shikchiwakan muchi uni tik itukay ne Tajtzin Yeshu wan shikilwikan panpadiush ne Teut tuteku ipanpa.

¹⁸ Ne siwatket: shikintakamatikan ne anmushujshulejyu ken muneki ipal ne Tajtzin.

¹⁹ Ne takamet: shikintasujtakan ne anmusiwawan wan maka shikinhajwakan sujsul.

²⁰ Ne kukunet: shikintakamatikan ne anmutejteku ijtik muchi, ika uni ajwiak ipal ne Tajtzin.

²¹ Ne tetejteku: maka shikwalanikan inwan ne anmukukunew pal te kipuluat intaelewilis.

²² Ne tepaltekitinimet: shikintakamatikan ne ká anmutejtekuyu ipal anmuweyka, wan maka shitekitikan sema pal metzinhitat ken kichiwa ne ká kineki ma kitakan yek ne sekit, sute shimuchiwakan yujyulkanawak wan shiktakamatikan ne Tajtzin, ²³ ika ne tay ankichiwat iwan muchi anmuyulu, ankichiwat ken ipal ne Tajtzin wan tesu ipal takamet, ²⁴ wan ankimatit ka ne Tajtzin yawi metzintashtawia. Shitekitikan ipal ne Tajtzin Mawaltijtuk!

²⁵ Ká ne kichiwa tay te yek, yawi kikwi kenha, wan uni kenha ipal muchi.