Kawikaan 25

Ang Salita ng Dios (Tagalog Contemporary Bible)

25 Narito pa ang ilang kawikaan ni Solomon na kinopya ng mga tauhan ni Haring Hezekia ng Juda.
² Pinararangalan natin ang Dios dahil sa mga bagay na hindi niya ipinapahayag sa atin; pero pinararangalan natin ang mga hari dahil sa mga bagay na ipinapahayag nila sa atin.
³ Kung paanong hindi masukat ang lalim ng lupa at ang taas ng kalangitan, ganoon din ang isipan ng mga hari, hindi malaman.
⁴ Kailangang ang pilak ay maging dalisay muna bago ito magawa ng panday.
⁵ Kailangang alisin ang masasamang tauhan ng hari upang magpatuloy ang katuwiran sa kanyang kaharian.
⁶ Kung nasa harapan ka ng hari, huwag mong ibilang ang iyong sarili na parang kung sino ka o ihanay ang iyong sarili sa mararangal na tao.
⁷ Mas mabuti kung tawagin ka ng hari at paupuin sa hanay ng mararangal kaysa sabihin niyang umalis ka riyan at mapahiya ka sa kanilang harapan.
⁸ Huwag kang magpabigla-biglang magsabi sa korte ng iyong nakita. Kung mapatunayan ng isang saksi na mali ka, ano na lang ang gagawin mo?
⁹ Kung may alitan kayo ng iyong kapwa, itoʼy inyong pag-usapan muna. At ang lihim ng bawat isa ay huwag sasabihin sa iba.
¹⁰ Baka makarating sa kaalaman ng madla at kayoʼy maging kahiya-hiya.
¹¹ Kapag ang salitang binigkas ay angkop sa pagkakataon, itoʼy parang gintong mansanas na nakalagay sa isang lalagyang pilak.
¹² Sa taong nakikinig, ang magandang payo ng marunong ay higit na mabuti kaysa sa mga gintong alahas.
¹³ Ang mapagkakatiwalaang sugo ay nagbibigay ng kasiyahan sa kanyang pinaglilingkuran, tulad ng malamig na tubig sa panahon ng tag-init.
¹⁴ Ang taong hindi tumutupad sa kanyang pangako ay parang ulap at hangin na walang dalang ulan.
¹⁵ Ang mapagpasensya at ang mahinahon magsalita ay makapanghihikayat ng mga pinuno at kahit na ng may matitigas na puso.
¹⁶ Huwag kang kakain ng labis na pulot at baka magsuka ka.
¹⁷ Huwag kang dadalaw ng madalas sa iyong kapitbahay, baka magalit siya at sa iyo ay magsawa.
¹⁸ Ang taong sumasaksi ng kasinungalingan laban sa kanyang kapwa ay nakakapinsala tulad ng espada, pamalo at pana.
¹⁹ Ang pagtitiwala sa taong hindi mapagkakatiwalaan sa oras ng pangangailangan ay walang kwenta tulad ng paang pilay o ngiping umuuga.
²⁰ Kung aawitan mo ng masayang awitin ang taong nasa matinding kapighatian ay para mo na rin siyang hinubaran sa panahon ng taglamig o kayaʼy nilagyan mo ng suka ang kanyang sugat.
²¹ Kapag nagugutom ang iyong kaaway, pakainin mo; kapag nauuhaw, painumin mo.
²² Kapag ginawa mo ito mahihiya siya sa iyo at ang Panginoon ang magpapala sa iyo.
²³ Kung paanong ang hanging habagat ay nagdadala ng ulan, nagdadala naman ng galit ang naninira ng kapwa.
²⁴ Mas mabuting tumira ng mag-isa sa bubungan ng bahay^[a] kaysa sa loob ng bahay na kasama ang asawang palaaway.
²⁵ Ang magandang balita mula sa malayong lugar ay parang malamig na tubig sa taong nauuhaw.
²⁶ Ang matuwid na umaayon sa gawain ng masamang tao ay parang maruming balon at malabong bukal.
²⁷ Kung paanong masama ang pagkain ng labis na pulot, ganoon din ang paghahangad ng sariling kapurihan.
²⁸ Ang taong walang pagpipigil sa sarili ay madaling bumagsak gaya ng isang bayan na walang pader.