Job 34  Ang Pulong Sa Dios

34 Unya miingon si Elihu, ² “Kamong miingon nga maalamon kamo ug daghag nahibaloan, pamatia ninyo ako pag-ayo. ³ Kay maingon nga ang dila makahibalo kon unsay lamian ug dili lamian nga pagkaon, ang dalunggan makahibalo usab kon unsay husto o dili husto nga mga pulong. ⁴ Busa susihon nato kon unsay husto; tun-an nato kon unsay maayo. ⁵ Kay miingon si Job, ‘Inosente ako apan wala ako hatagi sa Dios ug hustisya. ⁶ Bisag matarong ako, giisip ako nga bakakon. Bisan wala akoy sala nga nahimo, gihatagan niya akog sakit nga walay pagkaayo.’

⁷ “Walay tawo nga sama kang Job nga dili madutlan ug pagtamay. ⁸ Ganahan siyang makig-uban sa daotan ug makasasala nga mga tawo. ⁹ Kay nagaingon siya, ‘Walay makuha ang tawo kon magtinguha siya sa pagpahimuot sa Dios.’ ¹⁰ Busa pamati kamo kanako, kamong nagaingon nga nakasabot kamo. Ang Makagagahom nga Dios dili mohimo ug daotan. ¹¹ Balosan niya ang tawo sumala sa iyang binuhatan; tagdon niya ang tawo sumala sa batasan niini. ¹² Imposible nga maghimo ang Makagagahom nga Dios ug daotan. Dili niya mahimong tuison ang hustisya. ¹³ May nagsugo ba kaniya sa pagdumala sa tibuok kalibotan? Siyempre wala! ¹⁴ Kon pagbuot sa Dios nga kuhaon ang gininhawa nga gihatag niya sa tawo, ¹⁵ mangamatay ang tanang mga tawo ug mobalik ngadto sa yuta.

¹⁶ “Kon may panabot ka, Job, pamatia kining akong isulti: ¹⁷ Makadumala ba ang Dios kon dili siya gusto ug hustisya? Nan, nganong gipakadaotan mo man ang matarong ug gamhanan nga Dios? ¹⁸ Dili ba nga ginabadlong man niya ang daotan ug walay pulos nga mga hari ug mga pangulo? ¹⁹ Wala niya pabori ang mga pangulo, ug wala niya ipalabi ang mga adunahan kaysa mga kabos, kay silang tanan managsama nga iyang gibuhat. ²⁰ Bisan ang mga tawong gamhanan mamatay lang ug kalit sa kagabhion, nga walay nagtandog kanila. ²¹ Gibantayan gayod sa Dios ang tanang ginahimo sa tawo. ²² Wala gayoy dapit nga mangitngit nga mahimong katagoan sa mga daotan. ²³ Dili na kinahanglan nga tawgon pa sa Dios ang tawo nga moadto sa iyang atubangan aron usisahon ug hukman. ²⁴ Dili na kinahanglan nga mag-imbestigar pa siya aron matangtang niya ang mga tawong anaa sa pangatungdanan ug pulihan ug lain. ²⁵ Tungod kay nasayod siya sa ilang ginahimo, kuhaan niya sila sa gahom ug laglagon bisan sa panahon sa kagabhion. ²⁶ Silotan niya sila atubangan sa kadaghanan tungod sa ilang kadaotan. ²⁷ Ginahimo niya kini tungod kay miundang sila sa pagsunod kaniya, ug wala sila magtagad sa iyang mga pamaagi. ²⁸ Gidaog-daog nila ang mga kabos, ug nadungog sa Dios ang ilang pagpakitabang. ²⁹ Apan bisan magpakahilom ug magtago ang Dios, walay makaingon nga dili husto ang iyang ginabuhat. Apan ang tinuod, nagabantay ang Dios sa mga tawo ug sa mga nasod ³⁰ aron masanta niya ang pagdumala sa dili diosnon nga mga tawo nga makahatag ug kadaot sa katawhan.

³¹ “Job, nganong dili ka man moduol sa Dios ug moingon, ‘Nakasala ako, apan dili na ako magpakasala pa’ o ³² ‘Ipadayag kanako ang akong sala. Kon nakasala ako, dili ko na kini buhaton pag-usab.’ ³³ Makapaabot ka ba nga ihatag sa Dios ang imong gihangyo kon dili ka maghinulsol? Anaa kanimo ang desisyon, ug dili kanako. Busa sultihi ako kon unsay imong desisyon. ³⁴ Ang mga tawong maalamon ug may panabot nga namati kanako, ³⁵ makaingon usab nga ang imong gisulti, Job, walay kaalam ug walay pulos. ³⁶ Angay ka gayod nga sulayan pag-ayo tungod sa imong sinultihan nga sama sa daotang tawo. ³⁷ Gidugangan mo pa ang imong sala pinaagi sa pagrebelde sa Dios. Gitamay ug giinsulto mo ang Dios sa among atubangan.”