Job 12

Ang Salita ng Dios (Tagalog Contemporary Bible)

Sumagot si Job

12 Sumagot si Job, ² “Ang akala nʼyo baʼy kayo lang ang marunong at wala nang matitirang marunong kapag namatay kayo? ³ Ako man ay marunong din gaya ninyo; hindi kayo nakahihigit sa akin. Alam ko rin ang lahat ng sinasabi ninyo. ⁴ Pero naging katawa-tawa ako sa aking mga kaibigan, kahit na matuwid ako at walang kapintasan, at kahit sinagot ng Dios ang mga dalangin ko noon. ⁵ Ang mga taong naghihirap na gaya ko na tila mabubuwal ay kinukutya ng mga taong walang problema. ⁶ Pero ang mga tulisan at ang mga taong ginagalit ang Dios ay namumuhay ng payapa gayong ang dinidios nilaʼy ang sarili nilang kakayahan.

^7-8 “Matututo ka sa ibaʼt ibang hayop – ang lumalakad, lumilipad, gumagapang, at ang lumalangoy. ⁹ Sapagkat alam nila na ang Panginoon ang may gawa nito.^{[a] 10} Nasa kamay niya ang buhay o hininga ng bawat nilalang, pati na ng tao. ¹¹ Kung alam ng dila ng tao kung alin ang masarap o hindi masarap na pagkain, alam din ng tainga ng tao kung alin ang mabuti o masamang salita. ¹² Maraming alam sa buhay ang matatanda, dahil habang tumatagal ang buhay nila, lalong dumarami ang kanilang nalalaman.

¹³ “Pero ang Dios ay hindi lang nagtataglay ng karunungan, nasa kanya rin ang kapangyarihan, at siya lang ang nakakaunawa kung ano ang dapat gawin. ¹⁴ Walang makapag-aayos ng kanyang sinisira, at walang makapagpapalaya sa kanyang ikinukulong. ¹⁵ Kung pipigilin niya ang ulan, matutuyo ang lupa, at kung ibubuhos naman niya ito, babahain ang lupa. ¹⁶ Makapangyarihan siyaʼt matagumpay, at nasa ilalim ng kanyang kapangyarihan ang mandaraya at ang dinadaya. ¹⁷ Inaalisan niya ng karunungan ang mga tagapayo, at ginagawang mangmang ang mga hukom. ¹⁸ Pinaaalis niya ang mga hari sa kanilang trono at ipinabibihag. ¹⁹ Tinatanggal niya sa tungkulin ang mga pari at ang mga taong may kapangyarihan. ²⁰ Pinatatahimik niya ang mga pinagkakatiwalaang tagapayo at inaalis ang karunungan ng matatanda. ²¹ Hinahamak niya ang mga mararangal na tao at inaalisan ng kakayahan ang mga may kapangyarihan. ²² Ang mga lihim ay kanyang inihahayag, at ang madilim ay pinapalitan ng liwanag. ²³ Pinalalakas niya ang mga bansa at pinapalawak ang kanilang teritoryo, pero ibinabagsak din niya ito at winawasak. ²⁴ Ginagawa niyang mangmang ang kanilang mga pinuno at inililigaw sila sa ilang. ²⁵ Kaya para silang bulag na kumakapa sa dilim at sumusuray-suray na parang lasing.