Job 12  Ang Pulong Sa Dios

Ang Tubag ni Job

12 Unya mitubag si Job, ² “Nagtuo kamo nga kamo ray maalamon, ug kon mamatay kamo, uban kaninyo nga mamatay ang kaalam! ³ Apan maalamon usab ako ug wala kamo makabintaha kanako. Nahibalo ang tanang tawo niining tanan ninyong gipanulti. ⁴ Nahimo akong kataw-anan sa akong mga higala bisag matarong ako ug walay ikasaway sa akong kinabuhi, ug bisan ginatubag sa Dios ang akong pag-ampo kaniadto. ⁵ Ang mga tawo nga sama kanako nga nagaantos ug halos dili na makabarog ginatamay sa mga tawo nga hayahay ug kahimtang. ⁶ Apan ang mga tulisan ug ang mga tawo nga nagapalagot sa Dios nagakinabuhi nga malinawon bisan ug ang ilang abilidad maoy ilang gipakadios.^[a]

^7-8 “Kuhaig leksyon ang lain-laing klase sa mananap—ang mananap nga nagalakaw, ang nagalupad, ang nagakamang, ug ang nagapuyo sa tubig. ⁹ Kay silang tanan nahibalo niining gihimo sa Ginoo. ¹⁰ Anaa sa iyang kamot ang kinabuhi o ang gininhawa sa tanang binuhat, apil na ang sa tawo. ¹¹ Ang dila sa tawo mahibalo sa lami sa pagkaon, ug ang dalunggan mahibalo usab kon maayo ba o dili ang mga pulong. ¹² Ang mga tigulang may kaalam ug panabot, kay samtang nagataas ang ilang kinabuhi, nagkadaghan pa gayod ang ilang kahibalo.

¹³ “Apan anaa sa Dios ang kaalam, gahom, panabot, ug pagtambag. ¹⁴ Walay makatukod pagbalik sa iyang giguba, ug walay makaluwas sa iyang gipriso. ¹⁵ Kon pugngan niya ang ulan, moabot ang hulaw; ug kon buhian niya kini, daoton sa baha ang yuta. ¹⁶ Kusgan siya ug madaogon, ug ilalom sa iyang gahom ang nagapanglimbong ug ang ginalimbongan. ¹⁷ Kuhaan niya sa kaalam ang mga magtatambag, ug himuon niyang mga buang-buang ang mga maghuhukom. ¹⁸ Pakanaogon niya ang mga hari sa ilang trono ug ipabihag. ¹⁹ Tangtangon niya sa ilang katungdanan ang mga pari ug ang mga tawo nga dugay na sa pangagamhanan. ²⁰ Patak-omon niya ang baba niadtong ginatahod nga mga magtatambag, ug kuhaan niya sa hustong panabot ang mga tigulang. ²¹ Ipaubos niya ang mga dungganon ug kuhaan ug gahom ang gamhanan nga mga tawo. ²² Ipadayag niya ang mga tinago, ug lamdagan niya ang kangitngit. ²³ Himuon niyang gamhanan ang mga nasod, ug unya laglagon niya kini. Palapdon niya ang teritoryo niini ug unya isalikway niya kini. ²⁴ Himuon niyang mga buang-buang ang ilang mga pangulo, ug palatagawon niya sila sa disyerto. ²⁵ Magpangapkap sila sa kangitngit ug magsukarap sama sa hubog.”