Hoseya 5

Mawu a Mulungu mu Chichewa Chalero

⁴ “Ntchito zawo siziwalola
    kubwerera kwa Mulungu wawo.
Mʼmitima mwawo muli mzimu wachiwerewere;
    Iwo sadziwa Yehova.
⁵ Kudzikuza kwa Israeli kwakhala umboni womutsutsa;
    Aisraeli, ngakhale Aefereimu, anagwa mʼmachimo awo;
    Yudanso anagwa nawo pamodzi.
⁶ Pamene adzapita ndi nkhosa zawo ndi ngʼombe zawo
    kukapereka nsembe kwa Yehova,
iwo sadzamupeza;
    Iye wawachokera.
⁷ Iwo ndi osakhulupirika kwa Yehova;
    amabereka ana amʼchigololo
ndipo chikondwerero chawo cha mwezi watsopano
    chidzawawononga pamodzi ndi minda yawo.

⁸ “Womba lipenga mu Gibeya,
    liza mbetete mu Rama.
Fuwulani mfuwu wankhondo mu Beti-Aveni;
    iwe Benjamini tsogolera.
⁹ Efereimu adzasanduka bwinja
    pa tsiku la chilango.
Ine ndikulengeza zomwe zidzachitikadi
    pakati pa mafuko a Israeli.
¹⁰ Atsogoleri a Yuda ali ngati anthu
    amene amasuntha miyala ya mʼmalire.
Ndidzawakhutulira ukali wanga
    ngati madzi a chigumula.
¹¹ Efereimu waponderezedwa,
    akulangidwa chifukwa chotsatira
    mafano.
¹² Ine ndili ngati njenjete kwa Efereimu,
    ngati chinthu chowola kwa anthu a ku Yuda.

¹³ “Efereimu ataona nthenda yake,
    ndi Yuda ataona zilonda zake,
pamenepo Efereimu anatembenukira kwa Asiriya,
    ndipo anawatumizira mfumu yayikulu kudzawathandiza.
Koma mfumuyo singathe kukuchizani,
    singathe kuchiritsa mabala anu.
¹⁴ Pakuti Ine ndidzakhala ngati mkango kwa Efereimu.
    Ngati mkango wamphamvu kwa Yuda.
Ndidzawakhadzula nʼkuchokapo;
    ndidzawatenga ndipo palibe amene adzawalanditse.
¹⁵ Ndipo ndidzabwerera ku malo anga
    mpaka anthu anga atavomereza kulakwa kwawo.
Ndipo iwo adzafunafuna nkhope yanga;
    mʼmasautso awo adzandifunitsitsa Ine.”