Hosea 9

Bíbélì Mímọ́ Yorùbá Òde Òn

⁵ Kí ni ẹ̀yin ó ṣe ní ọjọ́ àjọ̀dún tí a yàn
    ní àwọn ọjọ́ àjọ̀dún Olúwa?
⁶ Bí wọ́n tilẹ̀ yọ́ kúrò lọ́wọ́ ìparun
    Ejibiti yóò kó wọn jọ,
    Memfisi yóò sì sin wọ́n.
Ibi ìsọjọ̀ fàdákà wọn ni ẹ̀gún yóò jogún,
    Ẹ̀gún yóò bo àpótí ìṣúra fàdákà wọn.
Ẹ̀gún yóò sì bo
    gbogbo àgọ́ wọn.
^7 (A)Àwọn ọjọ́ ìjìyà ń bọ̀;
    àwọn ọjọ́ ìṣirò iṣẹ́ ti dé
    Jẹ́ kí Israẹli mọ èyí
Nítorí pé ẹ̀ṣẹ̀ yín pọ̀
    ìkórìíra yín sì pọ̀ gan an ni.
A ka àwọn wòlíì sí òmùgọ̀
    A ka ẹni ìmísí sí asínwín.
⁸ Wòlíì, papọ̀ pẹ̀lú Ọlọ́run,
    ni olùṣọ́ ọ Efraimu.
Síbẹ̀ ìdẹ̀kùn dúró dè é ní gbogbo ọ̀nà rẹ̀
    àti ìkórìíra ní ilé Ọlọ́run rẹ̀
⁹ Wọ́n ti gbilẹ̀ nínú ìwà ìbàjẹ́
    gẹ́gẹ́ bí i ọjọ́ Gibeah
Ọlọ́run yóò rántí ìwà búburú wọn
    yóò sì jẹ wọ́n ní yà fún ẹ̀ṣẹ̀ wọn.

¹⁰ “Mo rí Israẹli bí èso àjàrà ní aginjù.
Mo rí àwọn baba yín,
    bí àkọ́pọ́n nínú igi ọ̀pọ̀tọ́ ní àkọ́so rẹ̀.
Ṣùgbọ́n wọ́n tọ Baali-Peori lọ,
    wọ́n yà wọn sọ́tọ̀ fún òrìṣà tó ń mú ìtìjú bá ni,
ohun ìríra wọn sì rí gẹ́gẹ́ bí wọn ti fẹ́. ¹¹     Ògo Efraimu yóò fò lọ bí ẹyẹ
    kò ní sí ìfẹ́rakù, ìlóyún àti ìbímọ.
¹² Bí wọ́n tilẹ̀ tọ́ ọmọ dàgbà.
    Èmi yóò mú wọn ṣọ̀fọ̀ lórí gbogbo wọn
Ègbé ni fún wọn,
    nígbà tí mo yípadà kúrò lọ́dọ̀ wọn!
¹³ Mo rí Efraimu bí ìlú Tire
    tí a tẹ̀dó sí ibi dáradára
ṣùgbọ́n Efraimu yóò kó àwọn
    ọmọ rẹ̀ jáde fún àwọn apànìyàn.”

¹⁴ Fún wọn, Olúwa!
    Kí ni ìwọ yóò fún wọn?
Fún wọn ní inú tí ń ba oyún jẹ́
    àti ọyàn gbígbẹ.

¹⁵ “Nítorí gbogbo ìwà búburú tí wọ́n hù ní Gilgali
    Mo kórìíra wọn níbẹ̀,
nítorí ìwà ẹ̀ṣẹ̀ wọn.
    Èmi yóò lé wọn jáde ní ilé mi
Èmi kò ní ní ìfẹ́ wọn mọ́
    ọlọ̀tẹ̀ ni gbogbo olórí wọn.
¹⁶ Efraimu ti rẹ̀ dànù
    gbogbo rẹ̀ sì ti rọ,
    kò sì so èso,
Bí wọ́n tilẹ̀ bímọ.
    Èmi ó pa àwọn ọmọ wọn tí wọ́n fẹ́ràn jùlọ.”

¹⁷ Ọlọ́run mi yóò kọ̀ wọ́n sílẹ̀
    nítorí pé wọn kò gbọ́rọ̀ sí i;
    wọn yóò sì di alárìnkiri láàrín àwọn orílẹ̀-èdè.