Hosea 14:7-9

Magandang Balita Biblia

⁷ Magbabalik sila at maninirahan sa ilalim ng aking kanlungan.
Sila'y yayabong na gaya ng isang halamanan,
    mamumulaklak na parang puno ng ubas,
    at ang bango'y tulad ng alak mula sa Lebanon.
⁸ Efraim, lumayo ka na sa mga diyus-diyosan!
    Ako lamang ang tumutugon at nagbabantay sa iyo.
Ako'y katulad ng sipres na laging luntian,
    at mula sa akin ang iyong mga bunga.”
⁹ Unawain ng matalino ang mga bagay na ito,
    at dapat mabatid ng mga marunong.
Matuwid ang mga kaparaanan ni Yahweh,
    at ang mabubuti'y doon lumalakad,
    ngunit nadarapa ang mga masuwayin.