Hebraea 3

Reimer 2001

3 Doaromm, heilje Breeda, dee jie en Aundeel ha aun daen himlische Beroop, betracht daen Apostel en Huagapriesta daen wie bekjanne, Jesus,

² dee daem tru wea dee am bestemt haud, so aus uk Mooses tru wea enn sien gaunset Hus.

³ Oba disem traft meeha Ea aus Mooses, soo aus dee, dee en Hus but jratre Ea haft aus daut Hus selfst.

⁴ Dan en jiedat Hus es fon waem jebut, oba Gott esset dee aules jebut haft.

⁵ Aun eene Haunt, Mooses wea tru enn sien gaunset Hus, aus en Deena, fa en Zeichnes fa daut waut noch enne Tookunft sull jesajcht woare;

⁶ Oba aune aundre Haunt, Christus aus en Saen aewa sien eajnet Hus, en wie sent daut Hus, wan wie Fetruehe en dee Freid enn onnse Hopninj faust hoole bottem Enj.

⁷ Doaromm - soo aus dee Heilje Jeist sajcht: "Fonndoag, wan jie siene Stem heare,

⁸ dan fehoat june Hoate nich soo aus enn dee Febettrunk enn daen dach aus jie fesocht worde enne Wiltness,

⁹ aus june Fodasch mie fesochte en oppe Proow stalde, en Featich Yoa miene Woakje sage.

¹⁰ Doaromm wea ekj aewa daut Jeschlajcht oajalich, en saed: 'Emma gone see enn aeare Hoate em Erwajch, en ha miene Waeaj nich jekjant,

¹¹ en soo schwua ekj enn mien Oaja, see woare nich enn miene Ru ennen kome.'"

¹² Seet junt faea, Breeda, daut kjeena fonn ju en beeset, onnjleewendet Hoat haft, daen laewendje Gott to felote.

¹³ Oba ermont junt unjarenaunda Dach fa Dach, so lang auset noch fonndoag heet, daut nich irjentwaea fehoat woat derch de Sind aeare Lest.

¹⁴ Dan wie sent met Christus eent jeworde, wan wie daut Toofetruehe daut wie em aunfank haude, faust hoole bottem Enj;

¹⁵ Wiel et noch jesajcht es: "Fonndoag, wan jie siene Stem heare, dan fehoat june Hoate nich, soo aus enn dee Febettrunk.

¹⁶ Weare doa soone dee sikj febetteda aus see heade? Doch nich aule dee ut Ejipte kjeeme derch Mooses.

¹⁷ Oba met waem wea hee oajalich dee featich Yoa? wearet nich met daen, dee sindjde, daen aeare Kjarpa enne Wiltness folle?

¹⁸ En to waem deed Gott schweare daut see nich enn siene Ru wudde enenn kome, buta dee, dee nich jeuarsaum weare?

¹⁹ Aulso see wie daut see nich kunne enenn kome wiel see nich jleewde.