Exodus 25:23-30

Ang Pulong Sang Dios

Ang Lamisa nga Ginabutangan sang Tinapay^(A)

²³ “Magpahimo ka man sang lamisa nga akasya, nga 36 ka pulgada ang kalabaon, 18 ka pulgada ang kasangkaron, kag 27 ka pulgada ang kataason. ²⁴ Pahaklapi ini sang puro nga bulawan kag parebitihi sang bulawan ang mga kilid sini. ²⁵ Pabutangi man ini sang sanipa^[a] sa kada kilid, nga apat ka pulgada ang kasangkaron, kag parebitihi sang bulawan ang sanipa. ²⁶ Dayon magpahimo ka sang apat ka sulosingsing nga bulawan kag itakod ini sa apat ka tiil sang lamisa, ²⁷ malapit sa sanipa. Diri ninyo igulo ang mga tukon nga pangtuwang sa lamisa. ²⁸ Dapat ini nga mga tukon akasya kag nahaklapan sang bulawan.

²⁹ “Magpahimo ka man sang mga pinggan, mga tasa,^[b] mga tibod, kag mga yahong nga gamiton para sa mga halad nga ilimnon.^[c] Kinahanglan nga puro ini tanan bulawan. ³⁰ Kag kinahanglan butangan permi sang tinapay nga ginahalad sa akon presensya ato nga lamisa.