Exodo 37:17-24

Magandang Balita Biblia

Ang Ilawan^(A)

¹⁷ Gumawa rin siya ng ilawang yari sa purong ginto. Ang patungan at tagdan nito'y yari sa pinitpit na purong ginto. Ang mga palamuti nitong bulaklak, ang buko at mga talulot ay parang iisang piraso. ¹⁸ Mayroon itong anim na sanga, tigatlo sa magkabila. ¹⁹ Bawat sanga ay may tatlong magagandang bulaklak na parang almendra, may usbong at may talulot. ²⁰ Ang tagdan ay may tig-apat ding bulaklak na tulad ng nasa sanga. ²¹ May tig-iisang usbong sa ilalim ng mga sanga, isa sa ilalim ng bawat sanga. ²² Ang mga usbong, mga sanga at ang tagdan ng ilawan ay iisang piraso na gawa sa purong ginto. ²³ Ang ilawan ay iginawa niya ng pitong ilaw na may kasamang pang-ipit ng mitsa at patungan na pawang dalisay na ginto. ²⁴ Ang nagamit sa ilawan ay tatlumpu't limang kilong purong ginto.