Exodo 25:31-40

Magandang Balita Biblia (with Deuterocanon)

Ang Lalagyan ng Ilaw^(A)

³¹ “Gumawa kayo ng ilawang yari sa purong ginto. Ang patungan at tagdan nito'y yari sa pinitpit na purong ginto. Ang mga palamuti nitong bulaklak, ang buko at mga talulot ay parang iisang piraso. ³² Lalagyan mo ito ng anim na sanga, tatlo sa magkabila. ³³ Bawat sanga'y lagyan mo ng tatlong magagandang bulaklak na parang almendra, may usbong at may talulot. ³⁴ Ang tangkay naman ay lagyan mo rin ng apat na bulaklak na tulad ng nasa sanga. ³⁵ Lalagyan mo ng usbong sa ilalim ng mga sanga, isa sa ilalim ng bawat dalawang sanga. ³⁶ Ang mga usbong, mga sanga, at ang tagdan ng ilawan ay gagawin ninyong isang piraso na gawa sa purong ginto. ³⁷ Gagawa kayo ng pitong ilaw para sa mga patungang ito. Iayos ninyo ito upang ang liwanag nito'y nasa harap ng ilawan. ³⁸ Ang pang-ipit ng mitsa at ang patungan ay dalisay na ginto rin. ³⁹ Sa lahat ng ito ay 35 kilong purong ginto ang gagamitin ninyo. ⁴⁰ Sundin^(B) mong mabuti ang planong ipinakita ko sa iyo sa bundok.