Ebrayujmet 1
Ne Bibliaj Tik Nawat
1 Ikman ne Teut kinnutzki ne tutejteku itech taketzanimet tik miak partej wan tik miak maneraj; 2 tik ini tijtipan tunal pal ashkan, yaja technutztuk itech ne ipiltzin ká ne kimakak muchi ne iherenciaj wan ká ipanpa kichijki muchi. 3 Yaja ne itawil tzitzinaka wan ne techilwitia ken Yaja. Yaja kiselia muchi iwan ne ipalabraj wey itajpal. Yaja kipupujtuk tay ne titateyekchijtiwit. Mutalijtuk ka imayekkan ne Wey tik ne wejkapan. 4 Muchijtuk sujsul mas yek que ne tanawatianimet, yajika kipia itukay sea yek.
5 Katiawel ijtik ne tanawatianimet welit tinat ka ne Teut kilwij ka:
Taja tinupiltzin!
Naja nimetzpunijtuk ashkan!
wan ukseujti:
Naja nimuchiwas iteku, wan yaja muchiwas nupiltzin?
6 Nusan kwak kikalaktia ne achtupunijtuk tik ne taltikpak, ina:
Wan muchi ne tanawatianimet ipal Teut mutankwaketzasket iishpan.
7 Yaja kinhilwia ne tanawatianimet ijkiuni:
Yaja kinkwepa ne itajtanawatiani nawalmet, wan ne itejtekitini tit.
8 Wan ini tay kilwia ne ipiltzin:
Ne mukuijpal, Teut, yaja pal senpa, wan ne itupil ne melaknajyu itupil ne mutatekimakalis. 9 Tiktasujtatuk tamelakchiwalis wan tikijishtuk ne tay inte nemi pal muchiwa. Neka metzmawaltij ne Teut, muteku Teut, iwan ne tumakka ipal pakilis, mas que mukunpawan.
10 Wan:
Taja, tajtzin, tikchijki itetzilnaj ne tal kwak pejki, wan ne ilwikak ne itekiw ne mujmumey. 11 Yejemet wilewisket, taja tinakas, wan muchi yejemet palanisket ken tukwajkwach. 12 Wan yejemet tikululus ken se tzuntzakka, wan mupatasket. Tajasan musel timukawas wan ne shijshiwit inte tamisket mupal.
13 Katiawel pal ne tanawatianimet kilwijtuk niakeman:
Shimutali ka numayekkan hasta ma nikintali ne kinekit metzijtakuat ken se petat itan ne mujmukshi?
14 Anka kia muchi yejemet nawalmet tujtuktijtuk pal tekitit ipal yejemet ká yawit mumakishtiat?
Ne Bibliaj Tik Nawat · © 2008, 2012 Jan Morrow