Bilang 28:26-31

Ang Salita ng Dios (Tagalog Contemporary Bible)

Ang mga Handog sa Panahon ng Pista ng Pag-aani^(A)

²⁶ “Sa unang araw ng Pista ng Pag-aani, sa panahon na maghahandog kayo sa Panginoon ng bagong ani ng trigo, huwag kayong magtatrabaho, sa halip magtipon kayo bilang pagsamba sa Panginoon. ²⁷ Maghandog kayo ng handog na sinusunog: dalawang batang toro, isang lalaking tupa at pitong batang lalaking tupa na isang taong gulang. Ang mabangong samyo ng handog na itoʼy makalulugod sa Panginoon. ²⁸ At sa paghahandog ninyo nito, samahan ninyo ito ng magandang klaseng harina na hinaluan ng langis, anim na kilo sa bawat toro, apat na kilo sa lalaking tupa ²⁹ at dalawang kilo sa bawat batang tupa. ³⁰ Maghandog din kayo ng isang lalaking kambing para sa kapatawaran ng inyong mga kasalanan. ³¹ Ihandog ninyo ito kasama ang mga handog na inumin bukod pa sa pang-araw-araw na handog na sinusunog at ng handog bilang pagpaparangal sa Panginoon. Siguraduhin ninyo na ang mga hayop na ito ay walang kapintasan.