⁴ “Ndimayitana Yehova amene ndi woyenera matamando,
    ndipo ndapulumutsidwa kwa adani anga.

⁵ “Mafunde a imfa anandizinga;
    mitsinje yothamanga yachiwonongeko inandiopsa kwambiri.
⁶ Anandimanga ndi zingwe za ku manda;
    misampha ya imfa inalimbana nane.

⁷ “Mʼmasautso anga ndinapemphera kwa Yehova;
    ndinapemphera kwa Mulungu wanga.
Iye ali mʼnyumba yake, anamva mawu anga;
    kulira kwanga kunafika mʼmakutu ake.

⁸ “Dziko lapansi linanjenjemera ndi kuchita chivomerezi,
    maziko a miyamba anagwedezeka;
    ananjenjemera chifukwa Iye anakwiya.
⁹ Mʼmphuno mwake munatuluka utsi;
    moto wonyeketsa unatuluka mʼkamwa mwake,
    makala amoto anali lawilawi mʼkamwa mwake.
¹⁰ Iye anangʼamba thambo natsika pansi;
    pansi pa mapazi ake panali mitambo yakuda.
¹¹ Iye anakwera pa Kerubi ndi kuwuluka;
    nawuluka ndi mphepo mwaliwiro.
¹² Iye anapanga mdima kukhala chofunda chake,
    mitambo yakuda ya mlengalenga.
¹³ Mʼkuwala kumene kunali pamaso pake
    munkachokera makala amoto alawilawi.
¹⁴ Yehova anabangula kumwamba ngati bingu,
    mawu a Wammwambamwamba anamveka ponseponse.
¹⁵ Iye anaponya mivi yake, nabalalitsa adani ake,
    ndi zingʼaningʼani zake anawagonjetsa.
¹⁶ Zigwa za mʼnyanja zinaonekera poyera,
    ndipo maziko a dziko lapansi anakhala poyera,
Yehova atabangula mwaukali,
    pamene mpweya wamphamvu unatuluka mʼmphuno mwake.

¹⁷ “Ali kumwamba, Iye anatambalitsa dzanja lake ndipo anandigwira;
    anandivuwula mʼmadzi ozama.
¹⁸ Anandipulumutsa kwa mdani wanga wamphamvu,
    adani anga amene anali amphamvu kuposa ine.
¹⁹ Adaniwo analimbana nane pamene ndinali pa mavuto,
    koma Yehova anali thandizo langa.
²⁰ Iye anandipititsa kumalo otakasuka;
    anandipulumutsa chifukwa amakondwera nane.

²¹ “Yehova wandithandiza molingana ndi chilungamo changa;
    molingana ndi makhalidwe anga abwino, Iye wandipulumutsa.
²² Pakuti ine ndinatsata njira za Yehova;
    ndilibe mlandu wochoka pamaso pa Mulungu wanga.
²³ Malamulo ake onse ali pamaso panga,
    sindinasiye malangizo ake.
²⁴ Ndakhala moyo wosalakwa pamaso pake
    ndipo ndakhala ndi kupewa tchimo.
²⁵ Yehova wandipatsa mphotho molingana ndi chilungamo changa,
    molingana ndi makhalidwe anga abwino pamaso pake.

²⁶ “Kwa wokhulupirika, Inu mumaonetsa kukhulupirika kwanu,
    kwa anthu amakhalidwe abwino, Inu mumaonetsanso makhalidwe abwino,
²⁷ Kwa woyera mtima, Inu mumaonetsa kuyera mtima kwanu,
    koma kwa anthu achinyengo mumaonetsanso kunyansidwa nawo.
²⁸ Inu mumapulumutsa anthu odzichepetsa,
    koma maso anu amatsutsana ndi odzikuza ndipo mumawatsitsa.
²⁹ Inu Yehova, ndinu nyale yanga;
    Yehova wasandutsa mdima wanga kukhala kuwunika.
³⁰ Ndi thandizo lanu nditha kulimbana ndi gulu la ankhondo,
    ndi Mulungu wanga nditha kuchita zosatheka ndi munthu.

³¹ “Kunena za Mulungu, zochita zake ndi zangwiro;
    mawu a Yehova alibe cholakwika.
Iye ndi chishango
    kwa onse amene amathawira kwa iye.
³² Mulungu wina ndi uti wofanana nanu Yehova?
    Ndipo ndani amene ndi Thanthwe kupatula Mulungu wathu?
³³ Ndi Mulungu amene anandipatsa mphamvu
    ndi kulungamitsa njira yanga.
³⁴ Iye amasandutsa mapazi anga kukhala ngati ambawala yayikazi;
    Iye amandithandiza kuyimirira pamwamba pa mapiri.
³⁵ Iye amaphunzitsa manja anga kuchita nkhondo;
    manja anga amatha kuthyola uta wachitsulo.
³⁶ Inu mundipatsa ine chishango chanu cha chigonjetso;
    mumawerama kuti mundikweze.
³⁷ Inu mwalimbitsa njira yanga kuti ndiyende bwino,
    kuti mapazi anga asaterereke.

³⁸ “Ine ndinathamangitsa adani anga ndi kuwakantha;
    sindinabwerere mpaka iwo atawonongedwa.
³⁹ Ndinawakantha kotheratu, ndipo sanathe kudzukanso;
    Iwo anagwera pansi pa mapazi anga.
⁴⁰ Inu munandipatsa ine mphamvu yochitira nkhondo;
    munagwaditsa adani anga pa mapazi anga.
⁴¹ Inu muchititsa kuti adani anga atembenuke ndi kuthawa;
    ndipo ndinawononga adani anga.
⁴² Iwo anafuwula kupempha thandizo, koma panalibe ndi mmodzi yemwe owapulumutsa.
    Analirira kwa Yehova, koma sanawayankhe.
⁴³ Ine ndinawaperesa ngati fumbi la pa dziko lapansi;
    ndinawasinja ndipo ndinawapondaponda ngati matope a mʼmisewu.

⁴⁴ “Inu mwandipulumutsa mʼmanja mwa mitundu ya anthu;
    Inu mwandisunga kuti ndikhale mtsogoleri wa anthu a mitundu ina.
Anthu amene sindikuwadziwa ali pansi pa ulamuliro wanga.
⁴⁵     Alendo amadzipereka okha pamaso panga;
    akangomva za ine, amandigonjera.
⁴⁶ Iwo onse anataya mtima;
    anatuluka mʼmalinga awo akunjenjemera.

⁴⁷ “Yehova ndi wamoyo! Litamandidwe Thanthwe langa.
    Akuzike Mulungu, Thanthwe, Mpulumutsi wanga!
⁴⁸ Iye ndi Mulungu amene amabwezera chilango,
    amene amayika anthu a mitundu yonse pansi pa ulamuliro wanga,
⁴⁹     amene amandimasula mʼmanja mwa adani anga.
Inu munandikuza kuposa adani anga;
    munandilanditsa mʼmanja mwa anthu ankhanza.
⁵⁰ Choncho ine ndidzakutamandani Inu Yehova, pakati pa anthu a mitundu ina;
    ndidzayimba nyimbo zotamanda dzina lanu.

⁵¹ “Iye amapereka chipambano chachikulu kwa mfumu yake,
    amaonetsa kukoma mtima kwa wodzozedwa wake,
    kwa Davide ndi zidzukulu zake kwamuyaya.”