2 Mga Hari 8:16-24

Magandang Balita Biblia (with Deuterocanon)

Ang Paghahari ni Jehoram sa Juda^(A)

¹⁶ Nang si Joram na anak ni Ahab ay limang taon nang naghahari sa Israel,^[a] si Jehoram na anak ni haring Jehoshafat ay nagsimula namang maghari sa Juda. ¹⁷ Tatlumpu't dalawang taon siya nang maging hari, at walong taóng naghari sa Jerusalem. ¹⁸ Ginawa rin niya ang mga bagay na hindi kalugud-lugod kay Yahweh. Sinundan niya ang yapak ng mga naging hari ng Israel, tulad ng ginawa ng sambahayan ni Ahab na kanyang biyenan. ¹⁹ Gayunman,^(B) hindi pa rin ibinagsak ni Yahweh ang Juda alang-alang sa lingkod niyang si David at sa pangako niya rito na maghahari ang kanyang mga susunod na salinlahi sa habang panahon.

²⁰ Sa^(C) panahon ni Jehoram,^[b] naghimagsik ang Edom laban sa Juda at naglagay ng sariling hari. ²¹ Pumunta siya sa Zair, dala ang lahat niyang karwahe. Ngunit napaligiran sila ng mga Edomita kaya kinagabihan, nagpilit silang lumusot. Ang mga tauhan niya ay nagsitakas pauwi sa kani-kanilang bahay. ²² Mula noon, hindi na sakop ng Juda ang Edom.^[c] Hindi nagtagal, naghimagsik din ang Libna.

²³ Ang iba pang ginawa ni Jehoram^[d] ay nakasulat sa Kasaysayan ng mga Hari ng Juda. ²⁴ Namatay siya at inilibing sa bayan ni David, sa libingan ng kanyang mga ninuno. Ang humalili sa kanya bilang hari ay ang anak niyang si Ahazias.