4 Tajtasujtatuk, maka shikyulmatikan ne iijijiu muchi, mas yek ma shitachiakan pal ankitat su ne iijijiu se ipal ne Teut, ika miak sankataketzani kistiwit nujme. ² Niaw nimetzinhilwia ken welit ankishmatit ne Iijiutzin ne Teut: ne iijijiu muchi ká inat ka Yeshu Mawaltijtuk walaj tik iweyka, yejemet kisket itech ne Teut, ³ wan muchi ká inte inat ka Yeshu walaj itech ne Teut, inte; wan yajane ipal ne sankamawaltijtuk ne ankikaktiwit ka yaja witz wan ashan nemia ijtik ne taltikpak.

⁴ Anmejemet ipal ne Teut, kukunetzitzin, wan anwelitiwit inhijpak, ika ne nemi ijtik anmejemet mas wey que ne nemi ijtik ne taltikpak. ⁵ Yejemet ipal ne taltikpak, yajika tanutzat itech ne taltikpak wan ne taltikpak kinkaki. ⁶ Tejemet ipal ne Teut; ká kishmati ne Teut techkaki, ká inte ipal ne Teut inte techkaki. Ijkiuni tikishmatit ne iijiu ne tejkia wan ne iijiu ne tashijshikulis.

⁷ Tajtasujtatuk, timutasujtakan ne sejse iwan ne sejseuk, ika ne tetasujtalis kisa itech ne Teut wan muchi ká tetasujta nestuk itech ne Teut wan kishmati ne Teut. ⁸ Ká ne inte tetasujta inte kishmattuk ne Teut, ika ne Teut tetasujtalis. ⁹ Ijkini muneshtijtuk ne itetasujtalis ne Teut itzalan tejemet: ka ne Teut kititanijtuk ne ikunew ne isel kipishki ijtik ne taltikpak pal kiane, ipanpa, tejemet tiwelit tiyujyultuk. ¹⁰ Uni nemi ne tetasujtalis: intesu achka tejemet tiktasujtatiwit ne Teut asunte ka yaja techtasujtak wan kititanij ne ikunew pal mutapupulwia muchi tay titateyekchijtiwit.

¹¹ Tajtasujtatuk: asu ne Teut techtasujtak ijkiuni, tejemet nusan tinemit pal timutasujtat. ¹² Inte keman kitztuk aka Teut. Asu timutasujtat, ne Teut naka ijtik tejemet wan ne itetasujtalis naka yekajtuk tutech. ¹³ Ijkiuni tikmatit ka tinakat ijtik Yaja, wan Yaja ijtik tejemet, ika Yaja techmakatuk tay ipal ne iijiu, ¹⁴ wan tejemet titachishtiwit wan tinat ka ne Teteku kititanijtuk ne ikunew kimakishtia ne taltikpak.

¹⁵ Ká ne ina ka ijkia ka Yeshu ne ikunew ne Teut, ne Teut naka ijtik yajane wan yajane ijtik ne Teut, ¹⁶ wan tejemet tikishmattiwit wan tikyulmattiwit ne tetasujtalis ne kipia tupal ne Teut.

Ne Teut tetasujtalis, wan ne ká naka ijtik ne tetasujtalis, yaja naka ijtik ne Teut, wan ne Teut naka ijtik yaja.

¹⁷ Tutech yekawi ne tetasujtalis kwak inte tiawit timajmawit tik ne tunal ipal ne juicioj, ika kenha ken yajuni nemi tejemet nusan tinemit tik ini taltikpak. ¹⁸ Mawi inte kanaj tik ne tetasujtalis. Mas yek, ne tetasujtalis yekajtuk kitamuta wejka ne mawi, ika ne mawi techkukua; se ká majmawi inte yekawi tetasujta. ¹⁹ Tejemet tiktasujtat ika yaja techtasujtak achtu. ²⁰ Asu aka ina: "Naja niktasujta ne Teut", wan kishijia ne iiknew, inak sanka, ika ká ne inte kitasujta ne iiknew ne kitztuk inte weli kitasujta ne Teut ne inte kitztuk. ²¹ Wan ini techtuktijtuk pal kiane ká ne kitasujta ne Teut nusan ma kitasujta ne iiknew.