અયૂબ 39

Gujarati: પવિત્ર બાઈબલ

39 “ડુંગર પરની જંગલી બકરીઓ કેવી રીતે બચ્ચાંને જન્મ આપે છે તે શું તું જાણે છે?
    જંગલી હરણીં બચ્ચાઁને જન્મ આપે ત્યારે તમે એમને જોયાં છે?
² તમે તેને જાણો છો પર્વતની બકરી અને હરણે કેટલા મહિનાઓ સુધી તેઓના બચ્ચાંઓને પેટમાં રાખવા જોઇએ?
    તમે જાણો છો તે ક્યારે પ્રસવ કરશે?
³ તે પ્રાણીઓ નીચે સૂવે છે, તેઓને પ્રસૂતિ પીડાનો અનુભવ થાય છે
    અને તેઓ તેઓના બચ્ચાને જન્મ આપે છે.
⁴ આ બચ્ચાં વનવગડામાં ઊછરે છે અને મોટાં થાય છે.
    પછી તેઓ પોતાની માતાને છોડીને જાય છે અને પાછા ફરતાં નથી.

⁵ “જંગલી ગધેડાંને કોણે છૂટો મૂક્યો?
    અથવા જંગલી ગધેડાના બંધ કોણે છોડી નાખ્યા છે?
⁶ મેં જંગલી ગધેડાઓ માટે રણને ઘર તરીકે રહેવા દીધુ છે.
    મેં તેઓને રહેવા માટે ખારી જમીન આપી છે.
⁷ જંગલી ગધેડાઓ ઘોંઘાટવાળા નગરો પર હસે છે.
    અને કોઇ તેઓને અંકુશમાં લઇ શકતા નથી.
⁸ જંગલી ગધેડાઓ પર્વતો પર રહે છે,
    કે જે તેઓનું ચરાણ છે.
    અને તેઓ તેઓનો ખોરાક શોધી કાઢે છે.

⁹ “શું તમારી સેવા કરવામાં જંગલી બળદો આનંદ માનશે ખરા?
    તેઓ તમારી ગમાણમાં રાત્રે આવીને તે રહેશે ખરાં?
¹⁰ જમીન ખેડવા માટે તમે તેને ઉપયોગમાં લઇ શકશો?
    શું તે તમારા માટે હળ ખેંચશે?
¹¹ જંગલી બળદ ખૂબ શકિતશાળી છે!
    પણ તમારું કામ કરાવવા માટે શું તમે તેની અપેક્ષા કરી શકશો?
¹² ખળામાંથી દાણા લાવીને વખારમાં ભરવા
    માટે તેના પર ભરોસો રાખી શું તેને મોકલશો?

¹³ “શાહમૃગ પોતાની પાંખો આનંદથી હલાવે છે.
    તેની પાંખો અને પીંછાઓ બગલાંની પાંખો જેવા નથી.
¹⁴ તે પોતાનાં ઇંડા જમીન પર મૂકે છે
    અને તેઓ રેતીમાં હૂંફાળા થાય છે.
¹⁵ કોઇ પગ મૂકીને ઇંડાને છૂંદી નાંખશે અથવા જંગલી પ્રાણીઓ
    તેમનો નાશ કરી નાખશે તેની તેને ચિંતા નથી.
¹⁶ તે પોતાના બચ્ચાં વિષે એવી બેદરકાર રહે છે કે જાણે તે બચ્ચાં તેના પોતાના હોય જ નહિ.
    તે મરી જાય તો પણ તેને તેમની કશી ચિંતા હોતી નથી.
    કે તેની તે બધી મહેનત નિરર્થક થઇ ગઇ હતી.
¹⁷ કારણકે દેવે તેને બુદ્ધિહીન સરજી છે;
    તેણે તેને અક્કલ આપી નથી.
¹⁸ પરંતુ તે જ્યારે કૂદે છે અને દોડવા લાગે છે, તે ઘોડા અને તેના સવાર પર હસે છે,
    કારણકે તે કોઇપણ ઘોડા કરતાં વધુ ઝડપથી દોડી શકે છે.

¹⁹ “શું ઘોડાને તમે બળ આપો છો?
    તેની ગરદનંને કેશવાળીથી તમે ઢાંકો છો?
²⁰ તીડની જેમ તમે તેને કુદાવો છો?
    તેનો હણહણાટ કેવો ભવ્ય અને ભયજનક હોય છે?
²¹ એક ઘોડો ખુશ છે કારણકે તે ખૂબ બળવાન છે.
    તે તેની પગની ખરીથી જમીન ખોતરે છે અને યુદ્ધમાં ઝડપથી દોડી જાય છે.
²² તે ડરતો નથી, તે ડર ઉપર હસે છે.
    તે તરવાર જોઇને પાછો પડતો નથી.
²³ સૈનિકના તીરો નું ભાથું ઘોડાની બાજુમા જતા જે છે.
    ભાલો અને બીજા શસ્ત્રો જે તેનો સવાર ઊંચકીને લઇ જાય છે.
    તે સૂર્યથી ચળકે છે.
²⁴ ઘોડો ઊશ્કેરાઇ જાય છે.
    તે ખૂબ ઝડપથી જમીન પર દોડે છે.
જ્યારે રણશિંગડાનો અવાજ તે સાંભળે છે,
    તે સ્થિર રહી શકતો નથી.
²⁵ રણશિંગડાના નાદે નાદે એ હણહણે છે.
    યુદ્ધની ગંધ તેને દૂરથી આવે છે. સેનાપતિઓના હુકમો
    અને હકોટા એ સમજી જાય છે.

²⁶ “બાજ પક્ષી કેવી રીતે આકાશમાં ઊડે છે અને પોતાની પાંખો દક્ષિણ તરફ ફેલાવે છે તે શું તેઁ શીખવ્યું છે?
²⁷ શું તારી આજ્ઞાથી ગરૂડ પક્ષી ઊંચે ઊડે છે?
    શું તેં તેને પર્વતોમાં ઉંચે માળો બાંધવાનું કહ્યું હતું?
²⁸ ગરૂડ પર્વતના શિખર પર રહે છે.
    ખડક એ ગરૂડોનો કિલ્લો છે.
²⁹ ત્યાંથી તે પોતાનો શિકાર શોધી કાઢે છે,
    તેની આંખો તેને દૂરથી શોધી કાઢે છે.
³⁰ તેનાં બચ્ચાં પણ લોહી ચૂસે છે,
    અને જ્યાં મુડદાં પડ્યાં હોય ત્યાં જાય છે.”