અયૂબ 22

Gujarati: પવિત્ર બાઈબલ

¹² “શું દેવ આકાશમાં, ઊંચ્ચસ્થાનમાં, નથી?
    તારાઓની ઊંચાઇ જો, તેઓ કેટલાં ઊંચા છે.
¹³ અને છતાં તું કહે છે, ‘દેવ શું જાણે છે?
    કાળા વાદળોની^[a] આરપાર જોઇને તે આપણા વિશે અભિપ્રાય કેવી રીતે આપી શકવાનો છે?
¹⁴ જેવો તે આકાશની ધાર પર ચાલે છે,
    ગાઢ વાદળ તેને એવી રીતે ઢાંકી દે છે કે તે કાંઇ જોઇ શકતો નથી.’

¹⁵ “અયૂબ, તું પ્રાચીન માર્ગમા ચાલી રહ્યો છે
    જેના પર દુષ્ટ લોકો પહેલા ચાલતા હતા.
¹⁶ તે દુષ્ટ લોકો, તેઓનો મૃત્યુનો સમય આવે
    તે પહેલાંજ નાશ પામી ગયા હતા.
¹⁷ કારણકે તેઓ દેવને કહેતા હતાં કે, ‘તમે અમારાથી દૂર ચાલ્યા જાઓ;
    સર્વસમર્થ દેવ તમે અમને શું કરી શકવાનાં છો?’
¹⁸ તેમ છતઁા પણ દેવે જ એમનાં ઘર ખજાનાથી ભર્યા હતા ના!
    હું દુષ્ટ લોકોની સલાહ પ્રમાણે અનુસરી શકતો નથી.
¹⁹ ભલા લોકો તેમનો નાશ થતો જોઇને ખુશ થશે.
    અને નિર્દોષો દુષ્ટો પર હસશે.
²⁰ તેઓ કહે છે, ‘જુઓ, બાકી રહેલા અમારા દરેક શત્રુઓનો નાશ થઇ ગયો છે.
    અને અગ્નિ તેઓની સંપતિને ભરખી જાય છે.’

²¹ “અયૂબ, હવે તું તારી જાત દેવને સમર્પિત કરી દે,
    અને તેની સાથે સુલેહ કર, જેથી તારું ભલું થશે.
²² કૃપા કરીને એના મોઢેથી એનો બોધ સાંભળ અને સ્વીકાર કર.
    એની વાણી તારા હૃદયમાં ધારણ કર!
²³ જો તું સર્વસમર્થ દેવ પાસે પાછો વળે તો તારો પુનરોદ્ધાર થશે.
    પાપને તારા ઘરથી દૂર રાખજે.
²⁴ જો તું તારું ધન ધૂળ સમાન ગણીશ
    અને કંચનને કથીર સમાન માનીશ,
²⁵ ભલે સર્વસમર્થ દેવ તારું સોનું
    અને ચાંદીનો સંગ્રહ બને.
²⁶ તો સર્વસમર્થ દેવ તારો પરમ આનંદ બની જશે.
    અને તું દેવ સામે નજર મેળવીશ.
²⁷ તું જે કઇં અરજ કરીશ તે એ સાંભળશે,
    અને પછી તું તારી માનતાઓ પૂરી કરી શકીશ.
²⁸ તારી સર્વ યોજનાઓ સફળ થશે.
    તારા માર્ગમાં આકાશનું તેજ ઝળહળશે.
²⁹ દેવ અભિમાનીને પાડે છે
    અને નમ્રને બચાવે છે.
³⁰ તે જેઓ નિર્દોષ નથી તેઓને પણ ઉગારે છે,
    તારા હાથ ચોખ્ખા હશે તો તને પણ ઉગારશે.”