स्रेस्ठगीत 1

Awadhi Bible: Easy-to-Read Version

² ओकरे ओंठन क चुम्बनन स मोका ढाँपि लेइ द्या।
    तोहार पिरेम दाखरस स भी मीठा अहइ।
³ तोहार इत्र क सुगन्ध मोहक अहइ,
    मुला तोहार नाउँ मोरे बरे मूल्यवान इत्र स भी जियादा मोहक अहइ!
    इहइ कारण अहइ कि कुँवरियन तोहसे पिरेम करत हीं!
⁴ हे मोर राजा, तू मोका आपन संग लइ ल्या।
    हाली चला!

हम तोहमाँ आनन्दित अउ मगन अही।
    हम मानत अही कि तोहार पिरेम दाखरस स उत्तिम अहइ।
    अच्छा कारण क बरे कुँवरियन तोहसे पिरेम करत हीं।

⁵ हे यरूसलेम क बिटियो,
    मइँ करिया हउँ, मुला मइँ सुन्नर हउँ। मइँ केदार क तम्बुअन जइसा अउ सलमोन^[a] क तम्बूअन क पर्दा जइसे करिया हउँ।
⁶ किन्तु मोका करिया मँ सामिल जिन करा।
    इ सूरज अहइ जउन मोका करिया कइ दिहस ह।
मोर भइयन एकर कारण अहइँ।
    उ मोका आपन अंगूरे क बगीचन क रखवारी करइ बरे मज़बूर किहेन ह।
    एह बरे मइँ आपन क धियान नाहीं रखि सकेउँ।

⁷ मइँ तोहका आपन पूरी आतिमा स पिरेम करत हउँ।
    मोर सच्चा पिरेमी, मोका बतावा कि तू आपन भेड़िन क कहाँ चरावत अहा?
    दुपहरिया मँ ओनका आराम करइ बरे कहाँ बइठावत अहा?
मोका अइसी एक ठु लड़िकी क लगे काहे होइ चाही
    जउन घूँघट डारिके तोहरे मीतन क झुण्डन क रखवारी करत ह।

⁸ हे मेहररुअन सबन त सुन्नरी,
    अगर तू नाहीं जानत ह मइँ कहाँ होब,
तउ भेड़ियन क पथ पाछा करा।
    तोहार बोकरियन क बच्चन क गड़रियन क तम्बुअन क लगे चरा।
⁹ हे मोर प्रिय मइँ तोहार तुलना उ घोड़ी स करत हउँ
    जउन घो़ड़िन फिरौन क रथ क हींचइवाल घोड़न क आकर्सित करत ह।
¹⁰ मइँ तोहार कल्पना चाँदी अउर रतन स सज़ा भवा घोड़ा स कइ सकत हउँ।
    तोहार गाल खूबसूरत आभूसण अउर कर्नफूल स भवा अहइ।
तोहार गर्दन पइ माला बहोत सुन्नर लगत अहइँ।
¹¹ जउन सोना अउर चाँदी क पत्तर लागत ह
    खास तोहरे बरे बना अहइँ।

¹² जब राजा गद्दी पइ लेटत अहइ,
    मोरे इत्र क सुगन्ध ओह तलक पहोंचत ह।
¹³ मोर प्रियतम रस गन्ध क कुप्पे जइसा अहइ।
    उ मोरे सीते क बीच सारी रात सोइ।
¹⁴ मोर प्रिय मोरे बरे मेंहदी क फूलन क गुच्छन जइसा अहइ
    जउन एनगदी क अंगूरे क बगीचे मँ फलत ह।

¹⁵ मोर प्रिये, तू रमणीय अहा।
    ओह, तू केतनी सुन्नर अहा।
    तोहार आँखिन कबूतरन क जइसी सुन्नर अहइँ।

¹⁶ हे मोर प्रियतम, तू केतना सुन्नर अहा।
    हाँ, तू केतना मनमोहक अहा।
हमार बिछाउन केतना ताज़ा अउर आनन्दित महक प्रदान करत हीं।
¹⁷     हमार घरे क छत देवदारू क पउधन स बना अहइँ।
    अउर देवारन सनोवर पउधन स बना अहइँ।