यसायाह 16

Awadhi Bible: Easy-to-Read Version

इ लूट रुक जाइ।
    सत्रु हार जइहीं अउर अइसे मनसेधू दूसर क नोस्कान करत हीं,
    इ धरती स उखड़िहीं।

⁵ फुन एक ठु नवा राजा आइ।
    इ राजा दाउद क घराने स होइ।
    उ सच्चाई स पूर्ण, करूणावाला अउ दयालु होइ।
इ राजा निआव कर्ता अउ निस्पच्छ होइ।
    उ खरे अउ नीक काम करी।

⁶ हम सुना ह कि मोआब क लोग
    बहोत अभिमानी अउ घमण्डी अहइँ।
इ सबइ लोग हिंसक अहइँ अउ बड़ा बोले भी।
    एनकर बड़ा बोल फुरइ नाहीं अहइ।
⁷ समूचा मोआब देस आपन अभिमान क कारण कस्ट उठाई।
    मोआब क सारे लोग विलाप करिहीं।
    उ सबइ लोग बहोत दुःखी रइहीं।
उ पचे अइसी वस्तुअन क इच्छा करिहीं जइसी ओनके लगे पहिले हुवा करत रहीं।
    उ पचे कीरहरासत मँ बने भए अंजीर क पूड़न क इच्छा करिहीं।
⁸ उ सबइ लोग बहोत दुःखी रहा करिहीं काहेकि हेसबोन क खेत अउर सिबमा क अंगूर क बेलन मँ अंगूर नाहीं लगाइ पावत अहइँ।
    बाहेर क सासकन अंगूर क बेलन क काट फेकेन ह।
याजेर क नगरी स लइके रेगिस्ताने मँ दूर दूर तलक सत्रु क फउजन फइल गइ अहइँ।
    उ पचे सागर क किनारे तलक जाइ पहोंची अहइँ।
⁹ “मइँ ओन लोगन क साथ बिलाप करब जउन याजेर अउ सिबमा क निवासी अहइँ
    काहेकि अंगूर नस्ट कीन्ह गएन।
मइँ हेसबोन अउ एलाले क लोगन क साथ सोक करब
    काहेकि हुवाँ फसल नाहीं होइ।
हुवाँ गर्मी क कउनो फल नाहीं होइ।
    हुवाँ पइ आनन्द क ठहाके भी नाहीं होइहीं।
¹⁰ अंगूरे क बगिया मँ आनन्द नाहीं होइ अउर न ही हुवाँ गीत गावा जइहीं।
    मइँ कटनी क समय क सारी खुसी खतम कइ देब।
दाखरस बनवइ बरे अंगूर तउ तइयार अहइँ,
    किन्तु उ सबइ बर्बाद होइ जइहीं।
¹¹ एह बरे मइँ मोआब बरे बहोत दुःखी हउँ।
    मइँ कीरहरैम बरे बहोत दुःखी हउँ।
    मइँ ओन नगरन बरे बहोत जियादा दुःखी हउँ।
¹² मोआब क निवासी आपन ऊँचे पूजा क ठउरन पइ जइहीं।
    उ सबइ लोग पराथना करइ क जतन करिहीं।
किन्तु उ सबइ ओन सबहिं बातन क लखिहीं।
    जउन कछू घटि चुकी अहइ, अउर उ पचे पराथना करइ क दुर्बल होइ जइहीं।”