आमोस 2

Awadhi Bible: Easy-to-Read Version

मोआब क सजा

2 यहोवा इ सब कहत ह: “मइँ मोआब क लोगन क एनके जरिये कीन्ह गए अपराधन क जरूर सजा देबउँ। काहेकि मोआब एदोम क राजा क हड़्डियन क बारिके चूना बनाएस। ² एह बरे मइँ मोआब मँ आगी लगाउब अउर उ आगी करिय्योत क ऊँच किलन क नस्ट करी। हुआँ खउफनाक चिचियाहट अउ तुर्रही क अवाज होइ, अउर मोआब मरि जाइ। ³ एह बरे मइँ मोआब क राजा लोगन क समाप्त कइ देबउँ अउर मोआब क सबहिं प्रमुखन क मारि डाउब।” यहोवा उ सबइ कहेस।

यहूदा क सजा

⁴ यहूदा इ कहत ह: “मइँ यहूदा क ओकरे जरिये कीन्ह गए अनेक अपराधन बरे जरूर सजा देबउँ। काहेकि उ पचे यहोवा क आदेसन क माइन स इन्कार किहन। उ पचे ओनके आदेसन क नाहीं मानेन। ओनकर पुरखन झूठ पइ बिसवास किहेन अउर ओन लबार बातन यहूदा क लोगन स परमेस्सर क अनुसरण करब छोड़ाएन। ⁵ एह बरे मइँ यहूदा मँ आगी लगाउब अउर इ आगी यरूसलेम क ऊँच किलन क नस्ट कइ देइ।”

इस्राएल क सजा

⁶ यहोवा इ कहत ह: “मइँ इस्राएल क ओनके जरिये कीन्ह गए अपराधन बरे सजा जरूर देबउँ। काहेकि उ पचे चाँदी क टूकन बरे नीक अउ भोले-भाले लोगन क दास क रूप मँ बेचेस। उ पचे एक जोड़ी जूता खातिर गरीब लोगन क बेचेन। ⁷ उ पचे गरीब लोगन क धक्का दइके मुँहे क बले गिराएन अउर उ पचे ओनका कुचरत भए गएन। उ पचे कस्ट भोगन भए लोगन क एक ठु नाहीं सुनेन। पिता लोगन अउ पूतन एक ही जवान मेहरारु क संग तने स संबंध कायम किहेन, उ पचे मोरे पवित्तर नाउँ क अपवित्तर किहेन ह। ⁸ उ पचे गरीब लोगन क ओढ़नन क लिहन अउ उ पचे ओन पइ गलीचन क तरह तब तलक बइठेन जब तलक उ पचे वेदी पइ पूजा करत रहेन। उ पचे गरिबन क ओनकर ओढ़नन क रेहन रखिके सिक्कन उधार दिहन। उ पचे लोगन क जुर्माना देइ क मजबूर किहन अउर उ जुर्माने क रकम स आपन परमेस्सर क मन्दिर मँ पिअइ बरे दाखरस खरीदेन।

⁹ “मुला मइँ ही ओनकर पहिले एमोरियन क नस्ट किहे रहेउँ। एमोरी लोग ऊँच बरगदे क बृच्छ क नाई रहेन। उ पचे ओतने सक्तिवाले रहेन जेतने बांज क बृच्छ। मुला मइँ ओनके ऊपरे क फल अउ ओनके खाने क जड़न क नस्ट किहेउँ।

¹⁰ “उ मइँ ही रहेउँ जउन तू पचन्क मिस्र देस स निकारिके वाएउँ। चालीस बरिस तलक मइँ तू पचन्क रेगिस्ताने स होइके लाएउँ। मइँ तू पचन्क एमोरियन क भुइँया पइ कब्जा कइ लेइ मँ मदद दिहेउँ। ¹¹ मइँ तू पचन्क कछू पूतन क नबी बनाएउँ। मइँ तोहरे सबन्क नउजवानन मँ स कछू क नाज़ीर बनाएउँ। इस्राएल क लोगो, इ फुरइ अहइ।” यहोवा इ सबइ कहेस। ¹² “मुला तू लोग नाज़ीर लोगन क दाखरस पियाया। तू पचे नबियन क भविस्सवानी करइ स रोक्या। ¹³ तू लोग मोरे बरे भारी बोझा क नाई अहा। मइँ उ गाड़ी क तरह हउँ जउन बहोतइ जियादा अनाजे से लदी होइके कारण निहुरी होइ। ¹⁴ कउनो भी मनई बचिके नाहीं निकरि पाइ, हिआँ तलक कि सब स जियादा दौड़इवाला भी। सक्तिवाले मनसेधू भी काफी सक्तिवाला नाहीं रहिहीं। फउजियन आपन क बचाइ नाहीं पइहीं। ¹⁵ धनुस अउ बानवाले भी नाहीं बचि पइहीं। तेज दउड़इवाले भी नाहीं बचि पइहीं। घुडसवार भी जिअत पराइ नाहीं पइहीं, ¹⁶ उ समइ, बहोतइ बीर जोधा भी नंगे हाथन भाग खड़ा होइहीं। ओनका आपन ओढ़ना तलक पहिरइ तलक क समइ भी नाहीं मिली।” यहोवा इ सबइ कहेस ह।