ئەیوب 28

Kurdi Sorani Standard

¹² بەڵام دانایی لەکوێ دەدۆزرێتەوە و
    تێگەیشتن لەکوێ نیشتەجێیە؟
¹³ مرۆڤ نرخەکەی نازانێت و
    لە خاکی زیندوواندا نادۆزرێتەوە.
¹⁴ قووڵایی ژێر زەوی^[b] دەڵێت: «لەناو مندا نییە،»
    دەریا دەڵێت: «لەلای من نییە.»
¹⁵ دانایی نە زێڕی بێگەرد لە جیاتی دەدرێت و
    نە بە زیویش نرخەکەی دەکێشرێت.
¹⁶ نە بە زێڕی ئۆفیر و نە بە بەردی عاشقبەندی گرانبەها و
    نە بە یاقووتی شین دەکێشرێت.
¹⁷ نە زێڕ و نە بلور هاوتایەتی،
    نە بە دەفرێکی زێڕی بێگەرد دەگۆڕدرێتەوە.
¹⁸ لە پاڵ ئەودا نە مەرجان و نە یەشب باسیان ناکرێت و
    نرخی دانایی لە یاقووت بەهادارترە.
¹⁹ یاقووتی زەردی کوش هاوتای نابێت و
    بە زێڕی بێگەرد ناکێشرێت.

²⁰ ئیتر دانایی لەکوێ دەدۆزرێتەوە و
    تێگەیشتن لەکوێ نیشتەجێیە؟
²¹ لەبەرچاوی هەموو زیندووێک شاراوەیە و
    لەبەرچاوی باڵندەکانی ئاسمان داپۆشراوە.
²² لەناوچوون و مردن دەڵێن:
    «بە گوێی خۆمان هەواڵی ئەومان بیست.»
²³ خودا ڕێگاکەی تێدەگات و
    ئەو شوێنەکەی پێ دەزانێت.
²⁴ چونکە ئەو تەماشای ئەوپەڕی زەوی دەکات و
    هەموو ژێر ئاسمان دەبینێت.
²⁵ کاتێک کێشی بۆ با دروستکرد و
    ئاوەکانی بە پێوانە پێوا،
²⁶ کاتێک بۆ باران یاسای دانا و
    بۆ دەنگی هەورەتریشقەش ڕێگا،
²⁷ ئەو کاتە دانایی بینی و باسی کرد،
    ئامادەی کرد و هەروەها تاقی کرد.
²⁸ بە مرۆڤی فەرموو:
    «بێگومان دانایی لە لەخواترسییەوەیە و
    لە خراپە لادانیش لە تێگەیشتنەوەیە.»