Писмо од апостол Павле до

Тит

Авторство и вовед

1 Од Павле, Божји слуга и апостол на Исус Христос.

Јас сум испратен да им донесам вера на оние што Бог ги одбра, за да ја запознаат вистината и да живеат побожно. ² Таа произлегува од надежта дека ќе добиеме вечен живот, како што Бог уште одамна ни вети, а Тој не лаже. ³ Кога дојде вистинското време, Бог, нашиот Спасител, ја објави Својата порака, ми ја довери и ми наложи да им ја проповедам на луѓето.

⁴ Пишувам до Тит кој, заради тоа што имаме иста вера, ми е како вистински син. Ти посакувам Бог, нашиот Татко, и Исус Христос, нашиот Спасител, да ти бидат благонаклонети и да ти дадат мир.

Квалификации за водач на црква

⁵ Те оставив во Крит за да го довршиш она што остана недовршено: по сите градови да назначиш водачи^[a] во црквите. Како што ти наредив, ⁶ за да биде некој водач треба да биде без пороци, верен^[b] на својата сопруга, ако има деца, тие треба да имаат вера во Бог и да не ги бие глас дека се разуздани и непослушни.

⁷ Неопходно е оние што се надзорници^[c] во црквата, како Божји управители, да немаат пороци, да не бидат самовљубени и избувливи, да не бидат пијаници, зајадливи, ниту да бидат алчни по нечесна заработка. ⁸ Тие треба да бидат гостољубиви, да го сакаат доброто, да бидат разумни, правични, побожни луѓе што умеат да се контролираат. ⁹ Мора да се придржуваат до правилното учење. Така ќе можат да им помогнат и на други луѓе, проповедајќи им здраво учење, и ќе можат да ги изнесат на виделина грешките на оние што му се противставуваат на правилното учење.

За противниците

¹⁰ Има многу противници, особено од Евреите^[d], кои се занимаваат со бескорисни расправии и ги мамат луѓето. ¹¹ На таквите треба да им се затнат устите. Со своето погрешно учење тие цели семејства заведуваат, поучувајќи ги на она што не треба, а се од лакомост за пари кои нечесно ги печалат. ¹² Еден од нивните пророци, иако и самиот е од Крит, има кажано за нив:

„Жителите на Крит се лажливци,

зли ѕверови и мрзливи лапачи!“

¹³ Многу точно ги опишал! Сериозно да ги искараш, за да и се вратат на здравата вера, ¹⁴ да не се раководат од еврејските митови и од заповедите воспоставени од луѓе кои ја изопачуваат вистината.

¹⁵ За оној што е во срцето чист, се е чисто. За оние, пак, што се неверни, чии умови се валкани, чија совест е нечиста, за нив ништо не е чисто. ¹⁶ Тие тврдат дека Го знаат Бога, но со своите постапки го докажуваат спротивното. Одвратни се, непокорни и неспособни да направат барем нешто добро.