Матеј 21

Macedonian New Testament

21 Пристигнувајќи во близина на Ерусалим, дојдоа во градот Бетфага, на Маслиновата Гора, откаде што Исус испрати двајца од Своите ученици, ² порачувајќи им вака: „Отидете во селото пред вас; таму веднаш ќе најдете врзана магарица со нејзиното младо магаренце. Одврзете ги и доведете Ми ги овде. ³ Ако некој нешто ви приговори, кажете му дека му се потребни на Господарот^[a] и тој веднаш ќе ги пушти.“ ⁴ Ова се случуваше за да се исполни претскажаното од пророкот Захарија:

⁵ „Порачајте му на Ерусалим^[b]: Еве Го, иде Твојот цар,

понизно јавајќи на магарица и на магаренце -

рожбата на магарицата.“

⁶ Учениците отидоа и го извршија она што им го беше заповедал Исус: ⁷ ги доведоа магарицата и младото магаренце, ги ставија врз нив своите облеки и Исус седна на нив. ⁸ Голем број луѓе ги постилаа своите облеки по патот; други кршеа гранчиња од дрвјата и ги постилаа на патот. ⁹ А народот што врвеше пред Исус, како и оние што одеа по Него, воскликнуваа, извикувајќи: „Спаси не сега^[c], Давидов Сине! Благословен е Тој што доаѓа во името Господово! Спаси не сега Ти, Кој доаѓаш од небесните височини!“

¹⁰ Кога Исус влезе во Ерусалим, целиот град се раздвижи и почна да прашува: „Кој е Овој?“

¹¹ А народот одговараше: „Овој е пророкот Исус од градот Назарет, во покраината Галилеја!“

Исус го расчистува Храмот

(Мк. 11:15-19; Лк. 19:45-48; Јвн. 2:13-22) ¹² Исус влезе во Божјиот храм и ги истера сите кои купуваа и продаваа во храмот. Им ги преврте масите на менувачите на пари и тезгите на продавачите на гулаби, ¹³ и им рече: „Во Светото Писмо пишува дека Бог рекол:

,Мојот храм нека биде место за молитва^[d].‘

А вие го претворивте во разбојничко дувло!“

¹⁴ Во храмот Му доаѓаа на Исус слепи и сакати и Тој ги исцелуваше. ¹⁵ Но свештеничките поглавари и вероучителите се разгневија кога ги видоа чудата што Исус ги правеше и радосните извици на децата во храмот кои извикуваа: „Спаси не сега^[e], Давидов Сине!“ ¹⁶ И Му рекоа: „Слушаш ли што извикуваат децата!?“ А Исус им одговори: „Да! Зар во Псалмите не сте го читале ова: ,Усните на малите деца и на доенчињата ќе Ти оддаваат слава, Господе^[f]!?‘“

¹⁷ Тогаш Исус ги остави и излегувајќи од градот дојде во Бетанија, каде што и ноќеваше.

Проколнување на неплодната смоква: Со вера с

е е можно (Мк. 11:12-14, 20-24) ¹⁸ Рано утредента, на враќањето во Ерусалим, Исус огладне. ¹⁹ Забележувајќи една смоква покрај патот, се доближи, но бидејќи на неа најде само лисје, ја проколна, велејќи: „Род да нема на тебе довека!“ И смоквата веднаш се исуши.

²⁰ Вчудовидени од оваа глетка, учениците Го прашаа: „Како можеше смоквата наеднаш да се исуши?“ ²¹ А Исус им одговори: „Ве уверувам дека, доколку имате вера и не се сомневате, не само што ќе можете да го правите тоа што и се случи на смоквата, туку, ако и на оваа планина и речете: ,Подигни се и фрли се в море!‘ - тоа ќе се случи! ²² Ако верувате, ќе добиете се што ќе побарате преку молитва.“

Прашања за Исусовиот авторитет

(Мк. 11:27-33; Лк. 20:1-8) ²³ Кога Исус дојде во храмот и почна да поучува, Му пристапија свештеничките поглавари и народните старешини и Го прашаа: „Со какво право го правиш ова? Кој те овластил?“ ²⁴ Одговарајќи на ова, Исус им рече: „И Јас ќе ве прашам нешто, па ако ми одговорите ќе ви кажам и Јас со какво право го правам ова. ²⁵ Од каде го доби Јован Крстител правото да крштава: од Бога^[g] или од луѓето?“ Тие почнаа меѓу себе да си шепотат: „Ако кажеме дека го доби од Бога, ќе ни рече: ,Тогаш, зошто не му поверувавте?‘ ²⁶ Ако пак кажеме дека го доби од луѓето, се плашиме од народот, зашто сите го сметаа Јована за пророк.“ ²⁷ Затоа, тие Му одговорија: „Не знаеме!“ Тогаш Исус им рече: „Ни Јас нема да ви кажам кој Ми го даде правото да го правам ова што го правам!“

Споредба со два сина

²⁸ Потоа Исус им рече: „Што мислите за ова што ќе ви го кажам: еден човек имаше два сина. Отиде кај постариот и му рече: ,Синко, ајде појди на лозјето и работи денес таму.‘ ²⁹ Тој му одговори: ,Не сакам!‘ Но подоцна се премисли и отиде. ³⁰ Таткото отиде и кај помладиот син и му го кажа истото, на што овој рече: ,Ќе одам, господине‘, но не отиде. ³¹ Кој од двајцата ја изврши татковата волја?“ Тие Му одговорија: „Постариот!“ Тогаш Исус им рече: „Ве уверувам дека собирачите на данок^[h] и блудниците попрвин ќе доспеат во небесното царство отколку вие! ³² Бидејќи, Јован Крстител дојде кај вас за да ви го покаже патот на праведноста, но вие не му верувавте, додека собирачите на данок и блудниците му веруваа. Дури ни откако го видовте тоа, вие не се покајавте и не му поверувавте.“

Споредба со лозарите

- убијци (Мк. 12:1-12; Лк. 20:9-19) ³³ Исус продолжи да им зборува на свештеничките поглавари и на народните старешини: „Слушнете ја и оваа приказна. Си беше еднаш еден домаќин, кој насади лозје, го огради со плот, ископа јама за гмечење на грозјето и изгради чуварска кула. Потоа им го даде лозјето под наем на лозарите, а тој замина на пат. ³⁴ Кога дојде време за гроздобер, тој ги испрати своите слуги кај лозарите, за да му го донесат делот од бербата што му припаѓа како надомест. ³⁵ Но лозарите ги фатија слугите и едни претепаа, други убија, а некои каменуваа. ³⁶ Тогаш сопственикот повторно испрати слуги, овојпат во поголем број, но и со нив постапија на ист начин. ³⁷ Најпосле, сопственикот го испрати својот син, велејќи: ,Белки ќе имаат почит спрема син ми!‘ ³⁸ Но кога лозарите го видоа синот, си рекоа: ,Овој е наследникот! Ајде да го убиеме и да го присвоиме неговото наследство!‘ ³⁹ Го зграпчија, го исфрлија од лозјето и го убија. ⁴⁰ Што мислите, како ќе постапи со нив сопственикот на лозјето кога ќе дојде?“ - ги запраша Исус. ⁴¹ А тие Му одговорија: „Сигурно ќе ги погуби тие злосторници, а лозјето ќе им го даде под наем на други лозари, кои навреме ќе му го даваат плодот што му припаѓа.“

⁴² Исус им рече: „Зар не сте читале што вели Светото Писмо:

,Каменот што ѕидарите го отфрлија,

стана камен-темелник.

Тоа го направи Господ,

како прекрасна глетка пред нашите очи^[i]!‘“

⁴³ „Затоа“ - им рече Исус - „од вас ќе се одземе Божјото царство и ќе им се даде на луѓе кои донесуваат достоен плод.“

⁴⁴ („Кој ќе падне врз тој камен ќе се распарчи, а врз кого ќе падне тој камен - ќе го згмечи!“)^[j]

⁴⁵ Слушајќи ги Исусовите споредби, свештеничките поглавари и фарисеите^[k] сфатија дека се однесуваат на нив. ⁴⁶ Затоа, тие сакаа да Го уапсат, но се плашеа од народот, кој Го сметаше Исуса за пророк.