9 Одејќи така, Исус виде еден човек, кој беше слеп од раѓање. ² Неговите ученици Го запрашаа: „Учителе, зошто овој човек се родил слеп? Дали поради негов грев или поради грев на неговите родители?“

³ „Неговото слепило не е ни поради негов грев, ни поради грев на неговите родители“ - им одговори Исус. „Но поради неговото слепило, ќе се пројават Божјите дела над него. ⁴ Додека е ден, ние треба да го извршуваме тоа што од Мене го сака Оној што Ме испрати. Доаѓа ноќ, кога никој не ќе може да работи. ⁵ Додека сум во светот, Јас сум Светлина за светот.“

⁶ Штом го рече тоа, Исус плукна на земјата и со плунката направи кал. Со неа му ги намачка очите на слепиот ⁷ и му рече: „Оди, измиј се во бањата Шилоах^[a]“ (во превод значи: ,Испратен‘). Тој отиде, и откако се изми, се врати гледајќи!

⁸ Неговите соседи и оние што порано го гледаа како проси, велеа: „Зар овој не е човекот што седеше и просеше?“ ⁹ Едни велеа: „Тој е!“ Други велеа: „Не е тој, туку само личи на него!“ А самиот тој велеше: „Јас сум тој човек!“

¹⁰ Тогаш тие го прашаа: „Па како ти се отворија очите?“

¹¹ Тој им одговори: „Еден човек, по име Исус, направи кал, ми ги намачка очите и ми рече: ,Оди во бањата Шилоах и измиј се!‘ Откако отидов и се измив - прогледав!“

¹² Тие го прашаа: „Каде е Тој човек?“

„Не знам“ - одговори тој.

¹³ Потоа го доведоа човекот што порано беше слеп кај фарисеите. ¹⁴ А тој ден кога Исус направи кал и му ги отвори очите беше сабота^[b]. ¹⁵ Фарисеите повторно почнаа да го распрашуваат, како прогледал. „Ми стави кал на очите“ - им одговори тој - „Потоа се измив, и еве - гледам!“

¹⁶ Тогаш некои од фарисеите рекоа: „Овој човек не е од Бога, бидејќи не ја почитува^[c] саботата!“ Други, пак, велеа: „Како може грешен човек да прави вакви чуда!?“ Во врска со ова, се јави раздор меѓу нив.

¹⁷ Затоа повторно му се обратија на слепиот: „Што мислиш ти за човекот што ти ги отворил очите?“

„Пророк е!“ - одговори тој.

¹⁸ Но еврејските верски водачи не му поверуваа дека бил слеп и прогледал, па затоа ги повикаа неговите родители, ¹⁹ и ги запрашаа: „Ова ли е вашиот син за кого тврдите дека се родил слеп? Како тоа сега гледа?“

²⁰ Неговите родители им одговорија: „Знаеме дека ова е нашиот син, кој се роди слеп. ²¹ Но, како тоа сега гледа - не знаеме. Ниту, пак, го знаеме Човекот што му ги отворил очите. Прашајте го него, тој е возрасен и самиот може да зборува за себе!“ ²² (Неговите родители постапија вака, затоа што се плашеа од еврејските верски водачи. Причината за нивниот страв беше тоа што еврејските верски водачи се договорија да го исклучат^[d] од синагогата секој оној што ќе каже дека Исус е Месијата. ²³ Затоа неговите родители рекоа: „Тој е возрасен, него прашајте го!“)

²⁴ Така тие по вторпат го повикаа човекот што беше слеп и му рекоа: „Биди искрен пред Бог^[e]! Ние знаеме дека Тој човек е грешник!“

²⁵ „Јас не знам дали е Тој грешник“, - им одговори тој - „но, една работа знам: слеп бев, а сега гледам!“

²⁶ На тоа тие му рекоа: „Што ти направи? Како ти ги отвори очите?“

²⁷ „Веќе ви кажав“, - им одговори тој - „но вие не слушате! Зошто повторно сакате да чуете? Да не сакате и вие да станете Негови ученици?“

²⁸ Тие почнаа да го навредуваат, велејќи: „Ти си Негов ученик, а ние сме ученици на Мојсеј! ²⁹ Ние знаеме дека Бог му зборувал на Мојсеј, а не знаеме од каде е Овој Човек!“

³⁰ „Чудно!“ - им одговори човекот - „Вие не знаете од каде е, но Тој ми ги отвори очите! ³¹ Знаеме дека Бог не слуша грешници, туку ги слуша оние што имаат страхопочит кон Него и ја вршат Неговата волја. ³² Од почетокот на светот па до денес, не се чуло некој да му ги отвори очите на слепороден човек! ³³ Ако Тој Човек не беше од Бога, не ќе можеше ништо да стори.“

³⁴ Тие му возвратија: „До гуша си во гревови! Ти ли нас ќе не учиш!?“ И го исфрлија надвор.

Духовна слепота

³⁵ Исус слушна дека го исфрлиле надвор, па штом го најде, му рече: „Веруваш ли ти во Синот Човечки?“

³⁶ Човекот одговори: „А кој е Тој, Господине, за да верувам во Него?“

³⁷ Исус му рече: „Оној во Кого гледаш, Човекот со Кого разговараш - тоа е Тој!

³⁸ „Верувам, Господе“ - одговори тој, па се спростре ничкум и Му се поклони.

³⁹ Исус рече: „Јас дојдов на овој свет за да го извршам судот: да прогледаат оние што не гледаат, а да станат слепи оние што самоуверено мислат дека гледаат.“

⁴⁰ Некои од фарисеите што беа со Него Го слушнаа, па Му рекоа: „Зар и нас не сметаш за слепи^[f]!?“

⁴¹ Исус им рече: „Да бевте слепи, немаше да бидете виновни, но штом тврдите дека гледате - останувате виновни!“