Zabbuli 119

Endagaano Enkadde nʼEndagaano Empya

119 ^(A)Balina omukisa abo abatambulira mu butuukirivu;
    abatambulira mu mateeka ga Mukama.
^2 (B)Balina omukisa abo abagondera ebiragiro bye,
    era abanoonya Mukama n’omutima gwabwe gwonna.
^3 (C)Abo abatasobya, era abatambulira mu makubo ge.
⁴ Ggwe wateekawo ebiragiro byo;
    n’olagira bigonderwenga n’obwegendereza bungi.
⁵ Ayi Mukama, nsaba mbeerenga munywevu bulijjo;
    nga nkuuma bye walagira.
⁶ Bwe ntyo siriswazibwa, amaaso gange nga
    ngasimbye ku ebyo bye walagira byonna.
⁷ Nga njiga ebiragiro byo ebitukuvu,
    nnaakutenderezanga n’omutima omulungi.
⁸ Nnaakwatanga amateeka go;
    Ayi Mukama, tonsuulira ddala.

^9 (D)Omuvubuka anaakuumanga atya ekkubo lye nga ttereevu?
    Anaalikuumanga ng’agoberera ekigambo kyo nga bwe kiri.
^10 (E)Nkunoonya n’omutima gwange gwonna;
    tonzikiriza kuva ku mateeka go.
^11 (F)Ntadde ekigambo kyo mu mutima gwange;
    ndyoke nneme okwonoona.
^12 (G)Ogulumizibwe, Ayi Mukama;
    onjigirize amateeka go.
^13 (H)Njatula n’akamwa kange
    amateeka go gonna ge walagira.
¹⁴ Nsanyukira okugondera ebiragiro byo,
    ng’asanyukira eby’obugagga.
^15 (I)Nnaafumiitirizanga ku biragiro byo,
    ne nzisaayo omwoyo ku makubo go.
^16 (J)Nnaasanyukiranga amateeka go,
    era siigeerabirenga.

^17 (K)Omuddu wo omukolere ebirungi, mbe omulamu,
    ngobererenga ekigambo kyo.
¹⁸ Ozibule amaaso gange, nsobole okulaba
    eby’ekitalo ebiri mu mateeka go.
^19 (L)Nze ndi muyise ku nsi;
    tonkisa bye walagira.
^20 (M)Bulijjo emmeeme yange
    eyaayaanira amateeka go.
^21 (N)Onenya ab’amalala, abaakolimirwa,
    abaleka amateeka go.
^22 (O)Mponya okuduula kwabwe n’okunyooma kwabwe;
    kubanga bye walagira mbigondera.
²³ Newaakubadde ng’abalangira bansalira enkwe;
    naye nze, omuweereza wo, nnaafumiitirizanga ku biragiro byo.
²⁴ Amateeka go lye ssanyu lyange,
    era ge gannuŋŋamya.

^25 (P)Nzigweddemu amaanyi, ndi wansi mu nfuufu;
    nkusaba onzizeemu endasi ng’ekigambo kyo bwe kiri.
^26 (Q)Nakutegeeza bye nteesezza okukola, n’onnyanukula;
    onjigirize amateeka go.
^27 (R)Njigiriza amateeka go bye gagamba,
    nange nnaafumiitirizanga ku byamagero byo.
^28 (S)Emmeeme empweddemu ensa olw’okunakuwala;
    onzizeemu amaanyi ng’ekigambo kyo bwe kiri.
²⁹ Nzigiraako ddala ebyo ebitali bya butuukirivu;
    olw’ekisa kyo njigiriza amateeka go.
³⁰ Nonzeewo okubeera omwesigwa;
    ntambulire mu ebyo bye walagira.
^31 (T)Nnyweredde ku biragiro byo, Ayi Mukama,
    tondeka kuswazibwa.
³² Bw’onoosumulula omutima gwange,
    nnaatambuliranga mu makubo go ng’ebiragiro byo bwe biri.

^33 (U)Njigiriza, Ayi Mukama, okugonderanga ebiragiro byo;
    ndyoke mbinywezenga ennaku zonna ez’obulamu bwange.
³⁴ Mpa okutegeera ndyoke nkuume amateeka go
    era ngakwate n’omutima gwange gwonna.
³⁵ Ntambuliza mu mateeka go,
    kubanga mwe nsanyukira.
^36 (V)Okyuse omutima gwange ogulaze eri ebyo bye walagira;
    so si eri eby’okufuna ebitaliimu.
^37 (W)Kyusa amaaso gange galeme okunneegombesa ebitaliimu;
    obulamu bwange obufuule obuggya ng’ekigambo kyo bwe kiri.
^38 (X)Tuukiriza kye wasuubiza omuddu wo,
    kubanga ekyo kye wasuubiza abo abakutya.
³⁹ Nziggyako okunyoomebwa kuno kwe ntya,
    kubanga ebiragiro byo birungi.
^40 (Y)Laba, njayaanira ebiragiro byo;
    onkomyewo mu butuukirivu bwo.

⁴¹ Okwagala kwo okutaggwaawo kujje gye ndi, Ayi Mukama;
    ompe obulokozi bwo nga bwe wasuubiza;
^42 (Z)ndyoke mbeere n’eky’okwanukula abo abambonyaabonya;
    kubanga neesiga kigambo kyo.
⁴³ Toganya kigambo ekitali kya mazima okuva mu kamwa kange;
    kubanga essuubi lyange liri mu ebyo bye walagira.
⁴⁴ Nnaagonderanga amateeka go ennaku zonna,
    emirembe n’emirembe.
⁴⁵ Era nnaatambulanga n’emirembe,
    kubanga ngoberedde ebyo bye walagira.
^46 (AA)Era nnaayogeranga ku biragiro by’omu maaso ga bakabaka,
    nga sikwatibwa nsonyi.
⁴⁷ Kubanga nsanyukira amateeka go,
    era ngaagala.
⁴⁸ Nzisaamu nnyo ekitiibwa ebiragiro byo era mbyagala.
    Nnaafumiitirizanga ku mateeka go.

⁴⁹ Jjukira ekigambo kye wansuubiza, nze omuddu wo,
    kubanga gwe wampa essuubi.
^50 (AB)Ekiwummuza omutima gwange nga ndi mu bulumi
    kye kisuubizo kyo ekimpa obulamu.
^51 (AC)Ab’amalala banduulira obutamala,
    naye nze siva ku mateeka go.
^52 (AD)Bwe ndowooza ku biragiro byo eby’edda, Ayi Mukama,
    biwummuza omutima gwange.
^53 (AE)Nkyawa nnyo abakola ebibi,
    abaleka amateeka go.
⁵⁴ Ebiragiro byo binfuukidde ennyimba
    buli we nsula nga ndi mu lugendo lwange.
^55 (AF)Mu kiro nzijukira erinnya lyo, Ayi Mukama,
    ne neekuuma amateeka go.
⁵⁶ Olw’okukugonderanga
    nfunye emikisa gyo mingi.

^57 (AG)Ggwe mugabo gwange, Ayi Mukama;
    nasuubiza okukugonderanga.
^58 (AH)Nkwegayirira n’omutima gwange gwonna,
    ondage ekisa kyo nga bwe wasuubiza.
^59 (AI)Bwe ndabye amakubo amakyamu ge nkutte,
    ne nkyuka okugoberera ebiragiro byo.
⁶⁰ Nyanguwa nnyo okugondera amateeka go,
    so seekunya.
^61 (AJ)Newaakubadde ng’emiguwa gy’ababi ginsibye,
    naye seerabirenga mateeka go.
^62 (AK)Nzuukuka mu ttumbi okukwebaza,
    olw’ebiragiro byo ebituukirivu.
^63 (AL)Ntambula n’abo abakutya,
    abo bonna abakwata amateeka go.
^64 (AM)Ensi, Ayi Mukama, ejjudde okwagala kwo;
    onjigirize amateeka go.

⁶⁵ Okoze bulungi omuddu wo, Ayi Mukama,
    ng’ekigambo kyo bwe kiri.
⁶⁶ Njigiriza okumanya n’okwawula ekirungi n’ekibi, era ompe okumanya;
    kubanga nzikiririza mu mateeka go.
^67 (AN)Bwe wali tonnambonereza nakyama nnyo,
    naye kaakano ŋŋondera ekigambo kyo.
^68 (AO)Ayi Mukama, oli mulungi era okola ebirungi;
    onjigirize amateeka go.
^69 (AP)Ab’amalala banjogeddeko nnyo eby’obulimba,
    naye nze nkwata ebyo bye walagira, n’omutima gwange gwonna.
^70 (AQ)Omutima gwabwe gugezze ne gusavuwala;
    naye nze nsanyukira amateeka go.
⁷¹ Okubonerezebwa kwangasa,
    ndyoke njige amateeka go.
^72 (AR)Amateeka go ge walagira ga mugaso nnyo gye ndi
    okusinga enkumi n’enkumi eza ffeeza ne zaabu.

^73 (AS)Emikono gyo gye gyankola ne gimmumba,
    mpa okutegeera ndyoke njige amateeka go.
^74 (AT)Abo abakutya banandabanga ne basanyuka,
    kubanga essuubi lyange liri mu kigambo kyo.
^75 (AU)Mmanyi, Ayi Mukama, ng’amateeka go matukuvu,
    era wali mutuufu okumbonereza.
⁷⁶ Kale okwagala kwo okutaggwaawo kumbeere kumpi kunsanyuse,
    nga bwe wansuubiza, nze omuddu wo.
^77 (AV)Kkiriza okusaasira kwo kuntuukeko ndyoke mbeere mulamu;
    kubanga mu mateeka go mwe nsanyukira.
^78 (AW)Ab’amalala baswazibwe, kubanga bampisizza bubi nga siriiko kye nkoze.
    Naye nze nnaafumiitirizanga ku biragiro byo.
⁷⁹ Abo abakutya bajje gye ndi,
    abategeera amateeka go.
⁸⁰ Mbeera, omutima gwange guleme kubaako kya kunenyezebwa mu mateeka go,
    nneme kuswazibwa!

^81 (AX)Emmeeme yange erumwa nnyo ennyonta ng’eyaayaanira obulokozi bwo,
    essuubi lyange liri mu kigambo kyo.
^82 (AY)Ntunuulidde ebbanga ddene n’amaaso gange ne ganfuuyirira nga nninda okutuukirira kw’ekisuubizo kyo;
    ne neebuuza nti, “Olinsanyusa ddi?”
⁸³ Newaakubadde nga nfuuse ng’ensawo ey’eddiba, eya wayini eri mu mukka^[a],
    naye seerabira bye walagira.
^84 (AZ)Ayi Mukama, nze omuddu wo nnaalindirira kutuusa ddi
    nga tonnabonereza abo abanjigganya?
^85 (BA)Abantu ab’amalala abatatya Katonda bansimidde ebinnya mu kkubo;
    be bo abatagondera mateeka go.
^86 (BB)Amateeka go gonna geesigibwa;
    abo abatakwagala banjigganyiza bwereere; nkusaba onnyambe!
^87 (BC)Baali kumpi okunzikiririza ddala ku nsi kuno;
    naye nze sivudde ku ebyo bye walagira.
⁸⁸ Olw’okwagala kwo okutaggwaawo ndekera obulamu bwange,
    ndyoke nkuume ebyo bye walagira ebiva mu kamwa ko.

^89 (BD)Ayi Mukama, Ekigambo kyo kinywevu mu ggulu,
    kya mirembe gyonna.
^90 (BE)Obwesigwa bwo tebuggwaawo emirembe gyonna;
    watonda ensi era enyweredde ddala.
^91 (BF)Amateeka go na buli kati manywevu;
    kubanga ebintu byonna bikuweereza.
⁹² Singa nnali sisanyukira mu mateeka go,
    nandizikiridde olw’obulumi bwe nalimu.
⁹³ Siyinza kwerabira biragiro byo;
    kubanga mu ebyo obulamu bwange mw’obufuulidde obuggya.
⁹⁴ Ndi wuwo, ndokola,
    kubanga neekuumye bye walagira.
⁹⁵ Newaakubadde ng’abakola ebibi beekukumye nga banteeze okunzikiriza;
    naye nze nyweredde ku ebyo bye walagira.
⁹⁶ Ebintu byonna biriko we bikoma
    naye amateeka go tegakugirwa.

^97 (BG)Amateeka go nga ngagala nnyo!
    Ngafumiitirizaako olunaku lwonna.
^98 (BH)Amateeka go ganfuula mugezi okusinga abalabe bange,
    kubanga ge gannuŋŋamya bulijjo.
⁹⁹ Ntegeera okusinga abasomesa bange bonna,
    kubanga nfumiitiriza nnyo ebyo bye walagira.
^100 (BI)Ntegeera okusinga abakadde;
    kubanga ŋŋondera ebyo bye walagira.
^101 (BJ)Neekuumye obutatambulira mu kkubo lyonna ekyamu,
    nsobole okugondera ekigambo kyo.
¹⁰² Sivudde ku mateeka go,
    kubanga ggwe waganjigiriza.
^103 (BK)Ebisuubizo byo nga bimpoomera nnyo!
    Biwoomera akamwa kange okusinga omubisi gw’enjuki.
^104 (BL)Mu biragiro byo mwe nfunira okutegeera;
    kyenva nkyawa ekkubo lyonna ekyamu.

^105 (BM)Ekigambo kyo ye ttaala eri ebigere byange,
    era kye kimulisa ekkubo lyange.
^106 (BN)Ndayidde ekirayiro era nkikakasizza
    nga nnaakwatanga amateeka ag’obutuukirivu bwo.
¹⁰⁷ Nnumizibwa nnyo;
    nzizaamu obulamu, Ayi Mukama, ng’ekigambo kyo bwe kiri.
^108 (BO)Okkirize Ayi Mukama ettendo akamwa kange lye kakuwa;
    era onjigirize amateeka go.
^109 (BP)Newaakubadde ng’obulamu bwange ntera okubutambuza nga bwe njagala,
    naye seerabira mateeka go.
^110 (BQ)Abakola ebibi banteze omutego,
    naye sikyamye kuva ku ebyo bye walagira.
¹¹¹ Ebiragiro byo gwe mugabo gwange emirembe gyonna;
    weewaawo, ebyo bye bisanyusa omutima gwange.
^112 (BR)Omutima gwange gweteeseteese okukwatanga ebiragiro byo
    ennaku zonna ez’obulamu bwange.

^113 (BS)Nkyawa abalina emitima egisagaasagana,
    naye nze njagala amateeka go.
^114 (BT)Ggwe kiddukiro kyange era ggwe ngabo yange;
    essuubi lyange liri mu kigambo kyo.
^115 (BU)Muve we ndi mmwe abakola ebitali bya butuukirivu,
    mundeke nkwate ebiragiro bya Katonda wange.
^116 (BV)Onnyweze nga bwe wasuubiza, ndyoke mbeere omulamu;
    nneme kuswazibwa ne nzigwamu essuubi.
¹¹⁷ Onnyweze ndyoke nfuuke ow’eddembe,
    era nkwatenga ebiragiro byo bulijjo.
¹¹⁸ Onyooma abo bonna abaleka ebiragiro byo;
    weewaawo obugezigezi bwabwe tebuliimu kantu.
^119 (BW)Abakola ebibi bonna mu nsi obalaba ng’ebisasiro;
    nze kyenva njagala ebyo bye walagira.
^120 (BX)Nkankana nzenna nga nkutya,
    era ntya amateeka go.

¹²¹ Nkoze eby’obwenkanya era eby’obutuukirivu;
    tondeka mu mikono gy’abo abanjooga.
^122 (BY)Okakase okundaganga ekisa kyo bulijjo,
    oleme kukkiriza ababi okunjooganga.
^123 (BZ)Amaaso gange ganfuuyiririra, nga nnindirira obulokozi bwo
    n’ebyo bye wasuubiza mu butuukirivu bwo.
^124 (CA)Nze omuddu wo nkolaako ng’okwagala kwo bwe kuli;
    era onjigirize amateeka go.
^125 (CB)Ndi muddu wo, mpa okwawula ekirungi n’ekibi;
    ndyoke ntegeere ebiragiro byo.
¹²⁶ Ekiseera kituuse, Ayi Mukama, okubaako ky’okola,
    kubanga amateeka go gamenyeddwa.
^127 (CC)Naye nze njagala amateeka go
    okusinga zaabu, wadde zaabu omulongoose.
^128 (CD)Kubanga mmanyi ng’ebiragiro byo byonna bituufu;
    nkyawa buli kkubo lyonna ekyamu.

¹²⁹ Ebiragiro byo bya kitalo;
    kyenva mbigondera.
^130 (CE)Ebigambo byo bwe binnyonnyolwa bireeta omusana;
    n’atategeera bulungi bimugeziwaza.
^131 (CF)Njasamya akamwa kange ne mpejjawejja
    nga njaayaanira amateeka go.
^132 (CG)Nkyukira, onkwatirwe ekisa,
    nga bw’okolera bulijjo abo abaagala erinnya lyo.
^133 (CH)Oluŋŋamye ebigere byange ng’ekigambo kyo bwe kiri,
    era tokkiriza kibi kyonna kunfuga.
^134 (CI)Mponya okujooga kw’abantu,
    bwe ntyo nkwatenga ebiragiro byo.
^135 (CJ)Ontunuulire, nze omuddu wo, n’amaaso ag’ekisa,
    era onjigirizenga amateeka go.
^136 (CK)Amaziga gakulukuta mu maaso gange ng’omugga,
    olw’abo abatakwata mateeka go.

^137 (CL)Oli mutuukirivu, Ayi Katonda,
    era amateeka go matuufu.
^138 (CM)Ebiragiro byo bye wateekawo bituukirivu,
    era byesigibwa.
^139 (CN)Nnyiikadde nnyo munda yange,
    olw’abalabe bange abatassaayo mwoyo eri ebiragiro byo.
^140 (CO)Ebisuubizo byo byetegerezebwa nnyo,
    kyenva mbyagala.
^141 (CP)Newaakubadde ndi muntu wa bulijjo era anyoomebwa, naye seerabira biragiro byo.
^142 (CQ)Obutuukirivu bwo bwa lubeerera,
    n’amateeka go ga mazima.
¹⁴³ Newaakubadde nga ndi mu kulumwa n’okutegana okungi,
    amateeka go ge gansanyusa.
^144 (CR)Ebiragiro byo bituufu emirembe gyonna;
    onjigirize okubitegeera ndyoke mbeere omulamu.

¹⁴⁵ Nkoowoola n’omutima gwange gwonna, Ayi Mukama, onnyanukule!
    Nnaagonderanga amateeka go.
¹⁴⁶ Nkukaabirira, ondokole,
    nkwate ebiragiro byo.
^147 (CS)Ngolokoka bunatera okukya ne nkukaabirira onnyambe;
    essuubi lyange liri mu kigambo kyo.
^148 (CT)Seebaka ekiro kyonna
    nga nfumiitiriza ku ebyo bye wasuubiza.
¹⁴⁹ Olw’okwagala kwo okutaggwaawo wulira eddoboozi lyange, Ayi Mukama,
    ompe obulamu obuggya ng’amateeka go bwe gali.
¹⁵⁰ Abo ab’enkwe era abatakwata mateeka go bansemberedde,
    kyokka bali wala n’amateeka go.
^151 (CU)Naye ggwe, Ayi Mukama, oli kumpi nange,
    era n’amateeka go gonna ga mazima.
^152 (CV)Okuva edda n’edda nayiga mu biragiro byo,
    nga wabissaawo bibeerewo emirembe gyonna.

^153 (CW)Tunuulira okubonaabona kwange omponye,
    kubanga seerabira mateeka go.
^154 (CX)Ompolereze, onnunule,
    onzizeemu obulamu nga bwe wasuubiza.
^155 (CY)Abakola ebibi obulokozi bubabeera wala,
    kubanga tebanoonya mateeka go.
^156 (CZ)Ekisa kyo kinene, Ayi Mukama,
    onzizeemu obulamu nga bwe wasuubiza.
^157 (DA)Abalabe abanjigganya bangi,
    naye nze siivenga ku biragiro byo.
^158 (DB)Nnakuwalira abo abatakwesiga,
    kubanga tebakwata biragiro byo.
¹⁵⁹ Laba, Ayi Mukama, bwe njagala ebiragiro byo!
    Onkuumenga ng’okwagala kwo bwe kuli.
¹⁶⁰ Ebigambo byo byonna bya mazima meereere;
    n’amateeka go ga lubeerera.

^161 (DC)Abafuzi banjigganyiza bwereere,
    naye ekigambo kyo nkissaamu ekitiibwa.
^162 (DD)Nsanyukira ekisuubizo kyo okufaanana
    ng’oyo afunye obugagga obungi.
¹⁶³ Nkyawa era ntamwa obulimba,
    naye amateeka go ngagala.
¹⁶⁴ Mu lunaku nkutendereza emirundi musanvu
    olw’amateeka go amatuukirivu.
^165 (DE)Abo abaagala amateeka go bali mu ddembe lingi;
    tewali kisobola kubeesittaza.
^166 (DF)Nnindirira obulokozi bwo, Ayi Mukama,
    era mu biragiro byo mwe ntambulira.
¹⁶⁷ Ŋŋondera ebiragiro byo,
    mbyagala nnyo nnyini.
^168 (DG)Buli kye nkola okimanyi,
    era olaba nga bwe nkwata ebiragiro byo.

^169 (DH)Okukaaba kwange kutuuke gy’oli, Ayi Mukama,
    ompe okutegeera ng’ekigambo kyo bwe kiri.
^170 (DI)Okwegayirira kwange kutuuke gy’oli,
    onnunule nga bwe wasuubiza.
^171 (DJ)Akamwa kange kanaakutenderezanga,
    kubanga gw’onjigiriza amateeka go.
¹⁷² Olulimi lwange lunaayimbanga ekigambo kyo,
    kubanga bye walagira byonna bya butuukirivu.
^173 (DK)Omukono gwo gumbeerenga,
    kubanga nnonzeewo okukwatanga ebiragiro byo.
^174 (DL)Neegomba nnyo obulokozi bwo, Ayi Mukama,
    era amateeka go lye ssanyu lyange.
^175 (DM)Ompe obulamu nkutenderezenga,
    era amateeka go gampanirirenga.
^176 (DN)Ndi ng’endiga ebuze.
    Onoonye omuddu wo,
    kubanga seerabidde mateeka go.